കണ്ണൂര്‍ സര്‍വകലാശാലയിലെ നിയമന വിവാദത്തെ തുടര്‍ന്ന് സര്‍ക്കാരിന് എതിരെ രൂക്ഷവിമര്‍ശനവുമായി പ്രതിപക്ഷ നേതാവ് വി ഡി സതീശന്‍. സര്‍വകലാശാലകളിലെ അധ്യാപക നിയമനം പിഎസ് സിക്ക് വിടണമെന്ന് വിഡി സതീശന്‍ പറഞ്ഞു. സര്‍വകലാശാലകളില്‍ അനധികൃതനിയമനം നടത്താനാണ് സര്‍ക്കാര്‍ സെര്‍ച്ച് കമ്മിറ്റി രൂപികരിച്ചതെന്നും വിഡി സതീശന്‍ എറണാകുളത്ത് മാധ്യമങ്ങളോട് പറഞ്ഞു. സര്‍വകലാശാലകളെ സര്‍ക്കാര്‍ ഡിപ്പാര്‍ട്ടുമെന്റാക്കാനാണ് സര്‍ക്കാരിന്റെ ശ്രമം. നിയമനിര്‍മ്മാണം നടത്താനുള്ള നീക്കത്തില്‍ നിന്ന് പിന്‍മാറണമെന്നും സതീശന്‍ പറഞ്ഞു. സിപിഎം നേതാക്കള്‍ക്ക് വേണ്ടി മാത്രം നിയമനം നടക്കുന്ന സമിതിയാണ്.
സിപിഎം നേതാക്കന്‍മാര്‍ക്കും അവരുടെ ബന്ധുക്കുള്‍ക്കും വേണ്ടി സര്‍വകലാശാലയിലെ അധ്യാപകനിയമനങ്ങള്‍ റിസര്‍വ് ചെയ്തിരിക്കുന്ന ദൗര്‍ഭാഗ്യകരമായ സാഹചര്യമാണ് ഉള്ളത്. ഏറ്റവും അവസാനം കണ്ണൂര്‍ യൂണിവേഴ്സിറ്റിയിലെ അധ്യാപകനിയമനത്തിലും അതുണ്ടായി. 25 വര്‍ഷത്തെ അധ്യാപന പരിചയവും നൂറില്‍ പരം ഗവേഷണപ്രബന്ധങ്ങളും ഉള്ള അധ്യാപകനെ ഒഴിവാക്കിയാണ് പുതിയ ആളെ നിയമിച്ചതെന്നും സതീശന്‍ പറഞ്ഞു.
യൂണിവേഴ്സിറ്റിയിലെ അധ്യാപക നിയമനം പിഎസ് സിക്ക് വിടണമെന്നതാണ് യുഡിഎഫിന്റെ തീരുമാനം. നേരത്തെ സര്‍വകലാശാലകളിലെ അനധ്യാപകനിയമനം പിഎസ് സിക്ക് വിട്ടത് യുഡിഎഫ് സര്‍ക്കാരാണ്. ഇതോടെയാണ് സര്‍വകലാശാലകളിലെ അനധ്യാപകനിയമനത്തിലെ അഴിമതി അവസാനിച്ചത്. വര്‍ഷങ്ങള്‍ ഗവേഷണം നടത്തി പിഎച്ച് ഡി എടുത്തവരെ മുഴുവന്‍ മാറ്റിനിര്‍ത്തി പാര്‍ട്ടിക്കാരെയും ബന്ധുക്കളെയും നിയമിക്കുന്നത് അവസാനിപ്പിക്കണമെന്നും സതീശന്‍ പറഞ്ഞു.
