മുക്കത്ത് വൃദ്ധയെ തട്ടിക്കൊണ്ടുപോയി അക്രമിച്ച് മാലകവര്‍ന്ന കേസില്‍ നിര്‍ണായക തെളിവുകള്‍ ശേഖരിച്ച് മുക്കം പോലീസ്. കേസില്‍ പ്രതികള്‍ അടുത്ത ദിവസംതന്നെ പിടിയിലായേക്കുമെന്നാണ് വിവരം. കേസ് നടന്നതുമുതല്‍ കൃത്യതയാര്‍ന്ന അന്വേഷണം നടത്തിയതിലൂടെയാണ് പ്രതികളെക്കുറിച്ചുള്ള വിവരങ്ങള്‍ പോലീസിന് ലഭിച്ചത്.
കോഴിക്കോട് റൂറല്‍ എസ്പി ശ്രീനിവാസ്, ഡിവൈഎസ്പി അഷ്‌റഫ്്, സിഐ സിജു ബി.കെ, കൂടാതെ മുക്കം പോലീസ് സ്‌റ്റേഷനിലെ പോലീസുകാരും സ്‌പെഷ്യല്‍ ബ്രാഞ്ച് ഉദ്യോഗസ്ഥരുമടങ്ങിയ സംഘമാണ് കേസ് അന്വേഷിക്കുന്നത്. അന്വേഷണത്തിനിടയില്‍ ഇന്ന് രാവിലെ മുക്കത്ത് നിന്ന് 10 കിലോ കഞ്ചാവുമായി രണ്ടുപേരെയും ഇവര്‍ പിടിച്ചിരുന്നു.
വീട്ടില്‍ നിന്നും ഹോട്ടല്‍ ജോലിക്കായി ഓമശ്ശേരിയ്ക്ക് പോകുകയായിരുന്ന മുത്തേരി സ്വദേശിനിയായ സ്ത്രീ ആയിരുന്നു അക്രമത്തിന് ഇരയായത്. മുത്തേരിയില്‍ നിന്നും ഓട്ടോറിക്ഷയില്‍ കയറിയതാണെന്നും പിന്നീട് നടന്നതൊന്നും ഓര്‍മ്മയില്ലെന്നുമാണ് ഇവര്‍ പറയുന്നത്.
മുത്താലം ഭാഗത്തായുള്ള ഓവു ചാലിന് സമീപം ബോധരഹിതയായി കിടക്കുന്ന സ്ത്രീയെ നാട്ടുകാര്‍ ആശുപത്രിയില്‍ എത്തിക്കുകയായിരുന്നു. കഴുത്തിലുണ്ടായിരുന്ന ഒരു പവന്റെ മാലയും, കാതില, സ്വര്‍ണത്തിന്റെ സ്റ്റഡ് ബാഗിലുണ്ടായിരുന്ന പണം,മൊബൈല്‍ എന്നിവ നഷ്ടപ്പെട്ടതായി യശോദ പോലീസിനോടായി പരാതിയില്‍ പറഞ്ഞിരുന്നു.
