കേരളത്തിന്റെ പുതിയ മുഖ്യമന്ത്രി ആരെന്ന കാര്യത്തിൽ ഇന്നുതന്നെ ഔദ്യോഗിക പ്രഖ്യാപനം ഉണ്ടായേക്കും. തീരുമാനം ഡൽഹിയിൽ നിന്ന് ഉടൻ ഉണ്ടാകുമെന്നും കെ.പി.സി.സി അധ്യക്ഷൻ സണ്ണി ജോസഫ് വ്യക്തമാക്കി. സോണിയ ഗാന്ധിയുടെ ആരോഗ്യനിലയുമായി ബന്ധപ്പെട്ട ആശുപത്രി സന്ദർശനം കാരണമാണ് പ്രഖ്യാപനം അല്പം വൈകിയതെന്നും അദ്ദേഹം കൂട്ടിച്ചേർത്തു.
ഡൽഹിയിൽ നടന്ന അതിനിർണ്ണായക ചർച്ചകളിൽ പങ്കെടുത്ത കേരളത്തിലെ ഭൂരിഭാഗം നേതാക്കളും കെ.സി വേണുഗോപാലിനെ പിന്തുണച്ചതായാണ് വിവരം. ഇക്കാര്യത്തിൽ പ്രത്യേക മുൻവിധികളില്ലെന്നും സംഘടനയുടെ താൽപ്പര്യവും കേരളത്തിലെ സാഹചര്യങ്ങളും പരിഗണിച്ചായിരിക്കും തീരുമാനമെന്നും രാഹുൽ ഗാന്ധി വ്യക്തമാക്കി. മുഖ്യമന്ത്രി പ്രഖ്യാപനം വൈകുന്നത് ഭരണനടപടികളെ ബാധിക്കുമെന്ന വിമർശനങ്ങൾക്കിടെയാണ് ഇന്ന് തന്നെ തീരുമാനമുണ്ടാകുമെന്ന ഉറപ്പ് ലഭിച്ചിരിക്കുന്നത്.
