മമതയുടെ വിശ്വസ്തനായിരുന്ന മുകുള് റോയ് തൃണമൂലിലേക്ക് മടങ്ങുന്നു. മുകുള് റോയ് മമത ബാനര്ജിയുമായി കൂടിക്കാഴ്ച നടത്തുന്നു. ചര്ച്ചകള്ക്കായി മുകുള് റോയ് തൃണമൂല് ഭവനിലെത്തി. പാര്ട്ടിയില് ചേരുന്നത് സംബന്ധിച്ച തീരുമാനം ഇന്നത്തെ കൂടിക്കാഴ്ചയ്ക്ക് ശേഷം അദ്ദേഹം പ്രഖ്യാപിക്കുമെന്നാണ് റിപ്പോര്ട്ടുകള്.
2017-ലാണ് മമതയുമായുള്ള അഭിപ്രായ വ്യത്യാസത്തെ തുടര്ന്ന് മുകുള് റോയ് തൃണമൂല് കോണ്ഗ്രസ് വിട്ടത്. പിന്നീട് 2019-ല് നടന്ന ലോക്സഭ തിരഞ്ഞെടുപ്പില് സംസ്ഥാനത്ത് ബി.ജെ.പിക്ക് മുന്നേറ്റമുണ്ടാക്കാന് മുകുള് റോയിക്കും സംഘത്തിനും സാധിച്ചിരുന്നു. എന്നാല്, 2021-ലെ നിയമസഭ തിരഞ്ഞെടുപ്പില് മുകുള് റോയിയെ ബി.ജെ.പി. അവഗണിച്ചു. പ്രതിപക്ഷ നേതൃസ്ഥാനത്തേക്ക് സുവേന്ദു അധികാരിയെയാണ് ബി.ജെ.പി. പരിഗണിച്ചത്. ഇത് പടലപ്പിണക്കത്തിന് ഇടയാക്കുകയായിരുന്നു. തുടര്ന്നാണ് തൃണമൂലിലേക്ക് തിരികെ പോകാന് മുകുള് റോയിയും മകന് ശുഭ്രാംശു റോയിയും ചില നേതാക്കളും തീരുമാനിച്ചത് എന്നാണ് വിവരം.
