കൊച്ചി: കരിമണല് കമ്പനിയില് നിന്നും മുഖ്യമന്ത്രി പിണറായി വിജയന്റെ മകള് വീണയും രാഷ്ട്രീയ നേതാക്കളും മാസപ്പടി വാങ്ങിയെന്ന ആരോപണത്തില് അന്വേഷണം ആവശ്യപ്പെട്ടുള്ള ഹര്ജിയില് ഹൈക്കോടതി ഇന്ന് വിധി പറയും. ജസ്റ്റിസ് കെ ബാബുവാണ് വിധി പറയുക.
മാസപ്പടി വിവാദത്തില് അന്വേഷണം ആവശ്യപ്പെട്ടുള്ള ഹര്ജി മൂവാറ്റുപുഴ വിജിലന്സ് കോടതി തള്ളിയിരുന്നു. ഇതിനെതിരെയാണ് പരാതിക്കാരനായ ഗിരീഷ്ബാബു ഹൈക്കോടതിയെ സമീപിച്ചത്. വിജിലന്സ് കോടതി ഉത്തരവ് തെറ്റെന്ന് ഹൈക്കോടതി നിയോഗിച്ച അമിക്കസ് ക്യൂറി നേരത്തെ അറിയിച്ചിരുന്നു. കേസില് തെളിവില്ലെന്ന വിജിലന്സ് കോടതി കണ്ടെത്തല് പ്രഥമദൃഷ്ട്യാ ശരിയല്ലെന്നും, രാഷ്ട്രീയ നേതാക്കള്ക്ക് പണം നല്കിയെന്നതിന് സാക്ഷിമൊഴികള് ഉള്ള സാഹചര്യത്തില് പ്രാഥമിക അന്വേഷണത്തിന് ഉത്തരവിടാമായിരുന്നുവെന്നുമാണ് അമിക്കസ് ക്യൂറിയുടെ റിപ്പോര്ട്ട്.
കരിമണല് കമ്പനിയില് നിന്നും പണം കൈപ്പറ്റിയതില് മുഖ്യമന്ത്രി പിണറായി വിജയന്, മകള് വീണ, രമേശ് ചെന്നിത്തല, കുഞ്ഞാലിക്കുട്ടി എന്നിവരടക്കമുള്ളവര്ക്കെതിരെ വിജിലന്സ് അന്വേഷണം വേണമെന്നാണ് ഹര്ജിയിലെ ആവശ്യം.
