വാഷിംഗ്ടണ് ഡിസിയില് നടന്ന ട്രംപ് അനുകൂല റാലിയില് ഉണ്ടായ സംഘര്ഷത്തില് മരണപ്പെട്ടവരുടെ എണ്ണം നാലായി. വെടിയേറ്റ് നേരത്തെ ഒരു സ്ത്രീ മരണപ്പെട്ടതിനു പിന്നാലെ മൂന്ന് പേര് കൂടി ആശുപത്രിയില് വെച്ച് മരിച്ചു. ഇക്കാര്യം വാഷിംഗ്ടണ് പൊലീസാണ് അറിയിച്ചത്. 52 പേരെയാണ് നിലവില് പൊലീസ് അറസ്റ്റ് ചെയ്തിരിക്കുന്നത്. കര്ഫ്യൂ നിയമം ലംഘിച്ചു എന്നാരോപിച്ചാണ് 47 പേരെ അറസ്റ്റ് ചെയ്തിരിക്കുന്നത്. അറസ്റ്റിലായവരില് നാലു പേര് ലൈസന്സില്ലാതെ തോക്കുകള് കൈവശം വെച്ചിരുന്നെന്ന് പൊലീസ് പറയുന്നു. രണ്ട് പൈപ് ബോംബുകള് പൊലീസ് ഇതുവരെ കണ്ടെടുത്തു. ഡെമോക്രാറ്റിക് നാഷണല് ഓഫീസില് നിന്നാണ് ഒരു പൈപ് ബോംബ് കണ്ടെടുത്തത്. റിപബ്ലിക്കന് നാഷണല് കമ്മിറ്റി ഓഫീസില് നിന്നാണ് രണ്ടാമത്തെ ബോംബ് കണ്ടെത്തിയത്.
സംഘര്ഷ സാഹചര്യം കണക്കിലെടുത്ത് ഫേസ്ബുക്ക് ഉള്പ്പെടെയുള്ള പ്രസിഡന്റ് ഡൊണാള്ഡ് ട്രംപിന്റെ എല്ലാ സോഷ്യല് മീഡിയ അക്കൗണ്ടുകളും മരവിപ്പിച്ചിരിക്കുകയാണ്. സംഘര്ഷത്തെ തുടര്ന്ന് വാഷിഗ്ടണില് മേയര് കര്ഫ്യൂ പ്രഖ്യാപിച്ചിരിക്കുകയാണ്. നഗരത്തില് ദേശീയ സുരക്ഷാ സേനയെ വിന്യസിച്ചിട്ടുണ്ട്. പ്രതിഷേധക്കാരോട് പിരിഞ്ഞു പോവാന് പറയണമെന്ന് ജോ ബൈഡന് ട്രംപിനോട് ആവശ്യപ്പെട്ടു.
യുഎസ് പാര്ലമെന്റായ ക്യാപിറ്റോള് ഹാളിനുള്ളില് അതിക്രമിച്ചു കയറിയ ട്രംപ് അനുകൂലികള് പൊലീസുമായി ഏറ്റുമുട്ടി. ആക്രമത്തില് ഒരു സ്ത്രീ കൊല്ലപ്പെട്ടു. ജോ ബൈഡന്റെ വിജയം അംഗീകരിക്കാന് യുഎസ് കോണ്ഗ്രസിന്റെ ഇരു സഭകളും സമ്മേളിക്കുന്നതിനിടെയാണ് സംഭവങ്ങള് അരങ്ങേറിയത്. ആക്രമത്തില് പരിക്കേറ്റ അഞ്ചു പേരെ ആശുപത്രിയില് പ്രവേശിപ്പിച്ചു.
സെനറ്റ് ചേംബറില് അതിക്രമിച്ച് കയറിയവര് അധ്യക്ഷന്റെ വേദിയില് കയറിപറ്റി ഇന്ത്യന് സമയം പുലര്ച്ചെ ഒന്നോടെയാണ് സംഭവം. ഇരു സഭകളും നിര്ത്തി വെച്ച് അംഗങ്ങളെ സുരക്ഷിത സ്ഥാനത്തേക്ക് മാറ്റിയിരിക്കുകയാണ്.