എൺപത്തിയൊന്ന് വർഷങ്ങൾക്ക് മുമ്പ്, ഇതേ ദിവസം, ആധുനിക യുദ്ധത്തിന് അഴിച്ചുവിടാൻ കഴിയുന്ന വൻ നാശത്തിന് ലോകം സാക്ഷ്യം വഹിച്ചു. 1945 ഓഗസ്റ്റ് 6 ന് രാവിലെ 8:15 ന്, അമേരിക്കൻ ബോംബറായ എനോള ഗേ ജാപ്പനീസ് നഗരമായ ഹിരോഷിമയ്ക്ക് മുകളിൽ ഒരു അണുബോംബ് വർഷിച്ചു. ചില കണക്കുകൾ പ്രകാരം, സ്ഫോടനം നഗരം നശിപ്പിക്കുകയും 1,40,000 പേർ കൊല്ലപ്പെടുകയും ചെയ്തു. മൂന്ന് ദിവസത്തിന് ശേഷം, മറ്റൊരു ജാപ്പനീസ് നഗരമായ നാഗസാക്കിയും അതേ ഭയാനകമായ നാശത്തിന്റെ കാഴ്ചകൾക്ക് സാക്ഷ്യം വഹിച്ചു.
രണ്ടാം ലോക മഹായുദ്ധകാലത്ത് ജപ്പാനെ പരാജയപ്പെടുത്തുന്നതിനായി അമേരിക്ക കണ്ടെത്തിയ അവസാനത്തെ മാർഗ്ഗമായിരുന്നു അണുവായുധ പ്രയോഗം. ബോംബ് നഗരത്തിന് ഏകദേശം 600 മീറ്റർ ഉയരത്തിൽ പൊട്ടിത്തെറിച്ചു. അതിശക്തമായ താപതരംഗം, സ്ഫോടനമർദം, തീപ്പിടിത്തം, മാരകമായ വികിരണം എന്നിവ ഒരേസമയം നഗരത്തെ വിഴുങ്ങി. നിമിഷങ്ങൾക്കകം കെട്ടിടങ്ങൾ തകർന്നുവീഴുകയും നഗരത്തിന്റെ വലിയൊരു ഭാഗം അഗ്നിക്കിരയാവുകയും ചെയ്തു. ആയിരക്കണക്കിന് മനുഷ്യരുടെ ജീവൻ കവർന്നതിനു പുറമേ, ലോകത്തെ ആണവയുഗത്തിലേക്കും തള്ളിവിട്ടു.
കെട്ടിടാവശിഷ്ടങ്ങൾക്കിടയിൽ കുടുങ്ങിയവരും തീയിൽ അകപ്പെട്ടവരും രക്ഷപ്പെടാൻ കഴിയാതെ മരിച്ചു. ആക്രമണസമയത്ത് നഗരത്തിലെ ജനജീവിതം സാധാരണ നിലയിലായിരുന്നു. ജോലിക്കായി പുറപ്പെട്ടവരും സ്കൂളുകളിലേക്ക് പോയ കുട്ടികളും വീടുകളിൽ പ്രഭാതകാര്യങ്ങളിൽ ഏർപ്പെട്ടിരുന്നവരുമാണ് ദുരന്തത്തിന്റെ ഇരകളായത്. ഹിരോഷിമയിലെ നാശനഷ്ടങ്ങൾ സ്ഫോടനത്തിൽ മാത്രം ഒതുങ്ങിയില്ല. ബോംബിൽ നിന്നുള്ള വികിരണം ജീവനോടെ രക്ഷപ്പെട്ടവരുടെ ശരീരത്തെയും ദീർഘകാലം ബാധിച്ചു. പിന്നീട് നിരവധി പേർക്ക് രക്താർബുദം, വിവിധ തരത്തിലുള്ള അർബുദങ്ങൾ, മറ്റ് ഗുരുതര ആരോഗ്യപ്രശ്നങ്ങൾ എന്നിവ റിപ്പോർട്ട് ചെയ്തു. ആണവായുധത്തിന്റെ ആഘാതം ഒരു നിമിഷത്തെ സ്ഫോടനത്തിൽ അവസാനിക്കുന്നതല്ലെന്നും തലമുറകളെ വരെ ബാധിക്കാമെന്നും ഹിരോഷിമ ലോകത്തിന് മുന്നറിയിപ്പ് നൽകി.
ഹിരോഷിമ ആക്രമണത്തിന് മൂന്ന് ദിവസത്തിന് ശേഷം, 1945 ഓഗസ്റ്റ് 9-ന് അമേരിക്ക ജപ്പാനിലെ നാഗസാക്കി നഗരത്തിൽ രണ്ടാമത്തെ ആണവബോംബ് പ്രയോഗിച്ചു. “ഫാറ്റ് മാൻ” എന്നറിയപ്പെട്ട ബോംബാണ് നാഗസാക്കിയിൽ പതിച്ചത്. ആദ്യ ലക്ഷ്യമായ കൊകുറ നഗരത്തിലെ പ്രതികൂല കാലാവസ്ഥയും കാഴ്ചാപ്രശ്നങ്ങളും കാരണം വിമാനം പിന്നീട് നാഗസാക്കിയിലേക്ക് വഴിമാറുകയായിരുന്നു.
ഹിരോഷിമയിലെയും നാഗസാക്കിയിലെയും ആണവാക്രമണങ്ങൾ രണ്ടാം ലോകമഹായുദ്ധത്തിന്റെ അവസാനത്തിലേക്ക് നയിച്ച പ്രധാന സംഭവങ്ങളിലൊന്നായി ചരിത്രത്തിൽ രേഖപ്പെടുത്തിയിട്ടുണ്ട്. 1945 ഓഗസ്റ്റ് 15-ന് ജപ്പാൻ കീഴടങ്ങൽ പ്രഖ്യാപിച്ചു. എന്നാൽ യുദ്ധം അവസാനിച്ചെങ്കിലും ആണവായുധങ്ങൾ സൃഷ്ടിച്ച ഭീതിയും മനുഷ്യനഷ്ടത്തിന്റെ ഓർമയും ലോകത്തെ വിട്ടുപോയില്ല.
ഹിരോഷിമ ആക്രമണത്തെത്തുടർന്ന് ലോകം പുതിയൊരു യാഥാർഥ്യത്തെ നേരിട്ടു—ശാസ്ത്രവും സാങ്കേതികവിദ്യയും മനുഷ്യപുരോഗതിക്കൊപ്പം വിനാശത്തിനും ഉപയോഗിക്കപ്പെടാം എന്ന യാഥാർഥ്യം. പിന്നീട് അമേരിക്കയും സോവിയറ്റ് യൂണിയനും ഉൾപ്പെടെയുള്ള രാജ്യങ്ങൾ ആണവായുധശേഖരം വർധിപ്പിച്ചതോടെ ലോകം ആണവയുദ്ധ ഭീഷണിയുടെ നിഴലിലായി.
ഹിരോഷിമയിലും നാഗസാക്കിയിലും ആണവാക്രമണത്തിൽ നിന്ന് രക്ഷപ്പെട്ടവരെ ജപ്പാനിൽ ഹിബാകുഷ എന്നാണ് വിളിക്കുന്നത്. ദുരന്തത്തിന്റെ നേരിട്ടുള്ള അനുഭവങ്ങൾ ലോകത്തോട് പങ്കുവെച്ച് ആണവായുധ നിരായുധീകരണത്തിനും സമാധാനത്തിനും വേണ്ടി ഇവരിൽ പലരും ജീവിതം സമർപ്പിച്ചു. അവരുടെ അനുഭവങ്ങൾ യുദ്ധത്തിന്റെ കണക്കുകൾക്കപ്പുറം മനുഷ്യജീവിതങ്ങളുടെ വേദനയെ ലോകത്തിന് മനസ്സിലാക്കിക്കൊടുത്തു.
ഇന്ന് ഹിരോഷിമ ഒരു ആധുനിക നഗരമായി പുനർനിർമിക്കപ്പെട്ടിട്ടുണ്ടെങ്കിലും, ആണവബോംബിന്റെ ഓർമകൾ നഗരത്തിന്റെ ചരിത്രത്തിന്റെ ഭാഗമാണ്. ഹിരോഷിമ പീസ് മെമ്മോറിയൽ പാർക്കും ആറ്റോമിക് ബോംബ് ഡോമും ദുരന്തത്തിന്റെ സാക്ഷ്യങ്ങളായി നിലകൊള്ളുന്നു.
70,000 ത്തോളം പേരെ നിമിഷങ്ങൾക്കകം കൊന്നൊടുക്കിയ ആ ദുരന്തദിനത്തിൻ്റെ ഓർമ്മയ്ക്കായി ജപ്പാൻകാർ ഹിരോഷിമയിൽ ഒത്തുകൂടി ലോക ശാന്തിക്കായി വർഷാവർഷം പ്രതിജ്ഞയെടുക്കുന്നു. യുദ്ധമില്ലാത്ത ലോകത്തിനായുള്ള സന്ദേശം ഉയർത്തുകയും ചെയ്യുന്നു.
ഹിരോഷിമ ദിനം ഒരു ചരിത്രദുരന്തത്തെ മാത്രം ഓർക്കാനുള്ള അവസരമല്ല. യുദ്ധത്തിന്റെ യഥാർഥ വില മനുഷ്യജീവിതങ്ങളാണെന്നും ആണവായുധങ്ങളുടെ ഉപയോഗം സൃഷ്ടിക്കുന്ന ദുരന്തം അതിരുകളില്ലാത്തതാണെന്നും ഓർമിപ്പിക്കുന്ന ദിനം കൂടിയാണിത്. സമാധാനം, സഹിഷ്ണുത, രാജ്യങ്ങൾ തമ്മിലുള്ള സംവാദം, ആണവായുധ നിരായുധീകരണം എന്നിവയുടെ ആവശ്യകത ലോകത്തിന് മുന്നിൽ വീണ്ടും ഉയർത്തിക്കാട്ടുകയാണ് ഓഗസ്റ്റ് 6.
