സംസ്ഥാനത്ത് മഴ കനത്തതോടെ നദികളില് ജലനിരപ്പ് ഉയര്ന്നു. പമ്പ, മണിമല, അച്ചന്കോവില്, കക്കാട് നദികളില് ജലനിരപ്പ് ക്രമാതീതമായി ഉയരുകയാണ്. നദീതീരത്തുള്ളവര് ജാഗ്രത പാലിക്കണമെന്നും, ജനങ്ങള് സുരക്ഷിതമായ ക്യാംപുകളിലേക്കു മാറണമെന്നും ജില്ലാ ഭരണകൂടം ആവശ്യപ്പെട്ടു.
എട്ട് ജില്ലകളിൽ റെഡ് അലർട്ട് പ്രഖ്യാപിച്ചു. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, കണ്ണൂർ എന്നീ ജില്ലകളിലാണ് റെഡ് അലർട്ട്.
അതേസമയം അഞ്ച് ജില്ലകൾക്ക് ഓറഞ്ച് അലർട്ട് പ്രഖ്യാപിച്ചിട്ടുണ്ട്. കൊല്ലം, മലപ്പുറം, കോഴിക്കോട്, വയനാട് ജില്ലകളിലാണ് ഓറഞ്ച് അലർട്ട് പ്രഖ്യാപിച്ചിരിക്കുന്നത്.
അതേസമയം, ശക്തമായ മഴയില് പാലാ നഗരത്തില് റോഡ് ഇടിഞ്ഞ് താണു, വലിയ ഗര്ത്തം രൂപപ്പെട്ടു. കുരിശുപള്ളി ജംഗ്ഷന് സമീപമാണ് സംഭവം. പോലീസ് എത്തി അപകടം ഉണ്ടാകാത്ത നിലയില് കയര് വലിച്ചുകെട്ടിയിട്ടുണ്ട്. രാവിലെ എട്ട് മണിയോടെയാണ് കുഴി രൂപപ്പെട്ടത്.
മീനച്ചിലാറിന്റെ ജലനിരപ്പ് മുന്നറിയിപ്പ് നിരപ്പില് നിന്നും ഉയര്ന്നു കഴിഞ്ഞു. പ്രദേശത്ത് ഗതാഗതം പൂര്ണമായും തടസപ്പെട്ടു. ഭരണങ്ങാനം -വിളക്കുമാടം റോഡില് വെള്ളക്കെട്ടുണ്ട്. അഴുതയാര് കര കവിഞ്ഞതോടെ കോരുത്തോട് മൂഴിക്കല് കോസ് വേ വെള്ളത്തിനടിയിലായി.
കിഴക്കന് മേഖലകളില് മഴ ഇടവിട്ട് തുടരുന്നതിനാല് പടിഞ്ഞാറന് മേഖലകളിലെ വെള്ളക്കെട്ട് തുടരുന്നു. കാഞ്ഞിരപ്പള്ളിയിലും വലിയ വെള്ളക്കെട്ട് രൂപപ്പെട്ടിട്ടുണ്ട്.
പറമ്പിക്കുളം ഡാമില് നിന്ന് കൂടുതല് വെള്ളം ഒഴുക്കി വിടുകയും ചാലക്കുടിപ്പുഴയുടെ വൃഷ്ടിപ്രദേശത്ത് മഴ ശക്തമാവുകയും ചെയ്തതോടെ ചാലക്കുടി പുഴയില് വെള്ളം ഉയര്ന്നുകൊണ്ടിരിക്കുകയാണ്.
കോന്നി കല്ലേലി ഭാഗത്ത് അച്ചന്കോവിലാര് കരകവിഞ്ഞു. റാന്നിയിലും താഴ്ന്ന പ്രദേശങ്ങളില് വെള്ളപ്പൊക്കം രൂക്ഷമായി. അറയാഞ്ഞിലിമണ് കോസ്വേ മുങ്ങി. കുടമുട്ടി റോഡ് തകര്ന്നു. പമ്പാ നദിയിലും ജലനിരപ്പ് ഉയര്ന്നു. പാലായില് മീനച്ചിലാറിലും ജലനിരപ്പ് അപകടകരമായ നിലയിലേക്ക് ഉയര്ന്നു. കാഞ്ഞിരപ്പിള്ളി കോരുത്തോട് ക്രോസ് വേ വെള്ളത്തിലായി. അപ്പര് കുട്ടനാട്ടില് ജലനിരപ്പ് അപകടനിലയില് തുടരുന്നു. ആലപ്പുഴ-ചങ്ങനാശ്ശേരി റോഡില് വാഹനയാത്ര ഒഴിവാക്കണമെന്ന് അധികൃതര് അറിയിച്ചു.
പറമ്പിക്കുളം ഡാമില്നിന്നുള്ള നീരൊഴുക്ക് കൂടിയതിനാല് പെരിങ്ങല്ക്കുത്ത് ഡാമിന്റെ മൂന്നാം ഷട്ടര് തുറന്നു. ഇടുക്കി ജില്ലയില് കനത്ത മഴ തുടരുകയാണ്. ഇതേത്തുടര്ന്ന് മുല്ലപ്പെരിയാര്, ഇടുക്കി ഡാമുകളിലേക്ക് നീരൊഴുക്ക് കൂടി. തൊടുപുഴയാറിലും ജലനിരപ്പ് ഉയര്ന്നു. ജനങ്ങള് ജാഗ്രത പാലിക്കണമെന്ന് അധികൃതര് നിര്ദേശിച്ചു. മലയോരപ്രദേശങ്ങളിലേക്കുള്ള യാത്ര ഒഴിവാക്കാനും നിര്ദേശിച്ചിട്ടുണ്ട്.
