സംസ്ഥാനത്ത് കോവിഡ് പശ്ചാത്തലത്തില് ആരംഭിച്ച വിക്ടേഴ്സ് ചാനല് വഴിയുള്ള ഓണ്ലൈന് ക്ലാസുകള് നിര്ത്തിവയ്ക്കാന് സര്ക്കാരിനു നിര്ദേശം നല്കണമെന്ന ആവശ്യം ഹൈക്കോടതി തള്ളി. എല്ലാ വിദ്യാര്ഥികള്ക്കും സൗകര്യം ഒരുക്കുന്നത് വരെ ക്ലാസുകള് നിര്ത്തിവെക്കണമെന്നാവശ്യപ്പെട്ടു സമര്പ്പിച്ച ഹര്ജിയിലാണ് ഹൈക്കോടതി നടപടി. കോവിഡ് മഹാമാരിയുടെ കാലത്ത് വിദ്യാഭ്യാസം മുന്നോട്ടുകൊണ്ടുപോവുന്നതിന് നടപടികള് ഉണ്ടായേ തീരൂവെന്ന് ഹൈക്കോടതി ചൂണ്ടിക്കാട്ടി. ഇക്കാര്യത്തില് ഇടക്കാല ഉത്തരവ് നല്കണമെന്ന ആവശ്യം അംഗീകരിക്കാനാവില്ലെന്ന ഹൈക്കോടതി പറഞ്ഞു.
സംസ്ഥാനത്ത് ഓണ്ലൈന് ക്ലാസുകള് തുടങ്ങുന്നത് ജൂണ് 14ന് ആണെന്ന് സര്ക്കാര് കോടതിയെ അറിയിച്ചു. ഇപ്പോള് നടക്കുന്നത് ട്രയല് മാത്രമാണ്. 14ന് മുമ്പ് എല്ലാ വിദ്യാര്ഥികളും പഠന സൗകര്യങ്ങള് ഒരുക്കുമെന്ന് സര്ക്കാര് ഉറപ്പുനല്കി.