കോഴിക്കോട് എൻ.ഐ.ടി-യിൽ തത്വ’22 സമാപിച്ചു
കോഴിക്കോട് എൻ.ഐ.ടി-യിൽ കഴിഞ്ഞ മൂന്നു ദിവസമായി നടന്ന ദക്ഷിണേന്ത്യയിലെ ഏറ്റവും വലിയ ടെക്നിക്കൽ ഫെസ്റ്റുകളിൽ ഒന്നായ തത്വ-’22 ആവേശകരമായ പരിപാടികളോടെ ഞായറാഴ്ച സമാപിച്ചു. വിവിധ പ്രഭാഷണങ്ങൾ, ഇവന്റുകൾ, മത്സരങ്ങൾ, വളരെയധികം പ്രശംസ നേടിയ പ്രോഷോകൾ എന്നിവയ്ക്ക് ആയിരക്കണക്കിന് കാണികൾ സാക്ഷ്യം വഹിച്ചു.
ക്രിപ്റ്റോകറൻസി, ഡിജിറ്റൽ മാർക്കറ്റിംഗ് തുടങ്ങിയ വിഷയങ്ങളിലെ ശിൽപശാലകളിൽ വിവിധ കോളേജുകളിൽ നിന്നുള്ള വിദ്യാർത്ഥികളുടെ ടീമുകൾ പങ്കെടുത്തു. തത്വയുടെ ഭാഗമായി സംഘടിപ്പിച്ച പ്രഭാഷണ പരമ്പര ജീക്ക്സ്ഫോർജീക്ക്സ് സ്ഥാപകനും സി.ഇ.ഒ-യുമായ സന്ദീപ് ജെയിൻ നടത്തിയ ഇൻ്റർവ്യൂ തയ്യാറെടുപ്പുകളെക്കുറിച്ചുള്ള വളരെ വിജ്ഞാനപ്രദമായ പ്രഭാഷണത്തോടെ സമാപിച്ചു. മൂന്നാം ദിവസം റോബോവാർ ഫൈനൽ, ‘ആക്സിലറോ ബോട്ട്ക്സ്’, കോഡിംഗ് മത്സരങ്ങളായ ‘ഷെൽ സീജ്’,’ഡീബഗ്ഗർ’ തുടങ്ങിയവ ആയിരുന്നു പ്രധാന ഇനങ്ങൾ. ഇന്ത്യൻ കരസേന, നാവികസേന, വ്യോമസേന എന്നിവയുടെ സ്റ്റാളുകളിൽ കാണികൾക്കായി വിവിധ ആയുധങ്ങൾ പ്രദർശിപ്പിച്ചു. വെർച്വൽ റിയാലിറ്റി, റോബോട്ടിക്സ് എന്നിവയെക്കുറിച്ചുള്ള ഒന്നിലധികം പ്രദർശനങ്ങളും ഉണ്ടായിരുന്നു.
സർക്യൂട്ട് ബ്രാഞ്ചുകൾ സംഘടിപ്പിച്ച ‘ഇ-റേസർ’, ‘സർക്യൂട്ട് റേസ്’ എന്നിവയുടെ ഫൈനൽ മത്സരങ്ങളും വലിയ താൽപ്പര്യം ജനിപ്പിക്കുകയും നല്ല ജനപങ്കാളിത്തം നേടുകയും ചെയ്തു. ഇന്ത്യയിലെ ഏറ്റവും മികച്ച ക്വിസ് മാസ്റ്റർമാരിൽ ഒരാളായ മേജർ ചന്ദ്രകാന്ത് നായർ നയിച്ച ക്വിസ് മത്സരം നല്ല ജനക്കൂട്ടത്തെ ആകർഷിച്ചു. ഇന്നലത്തെ മറ്റൊരു ജനപ്രിയ ഇവന്റ് ‘ട്രഷർ ഹണ്ട്’ ആയിരുന്നു. വിദ്യാർത്ഥികൾ അവരുടെ ഉള്ളിലെ പര്യവേക്ഷകരെ പുറത്തുകൊണ്ടുവന്ന് ‘നിധി’ കണ്ടെത്താൻ ശ്രമിച്ചു.
മൂന്നാം ദിവസം പ്രശസ്ത ബോളിവുഡ് ഗായിക ശ്രേയ ഘോഷൽ കാണികളെ സംഗീതലഹരിയിലാക്കി . അതിനുശേഷം പ്രശസ്ത ഇന്ത്യൻ ഡിജെ ഷാന്റെ പ്രകടനത്തോടെ തത്വ 2022 ന് തിരശ്ശീല വീണു.
