അപ്രതീക്ഷിതമായി അവർ ഉച്ച ഭക്ഷണത്തിന് വീട്ടിലെത്തി. നടൻ ജയറാമിൻറെ വീട് സന്ദർശിച്ച് സഞ്ജുവും ഭാര്യ ചാരുവും. ഈ നിമിഷം ഞങ്ങളുടെ സ്വകാര്യ അഹങ്കാരമാണെന്ന് ജയറാം ഫേസ്ബുക്കിൽ കുറിച്ചു. ഇക്കാര്യം സഞ്ജുവും ഇൻസ്റ്റാഗ്രാം പോസ്റ്റിലൂടെ പങ്കുവെച്ചിട്ടുണ്ട്. ‘നമ്മുടെ സ്വന്തം ജയറാമേട്ടനും, കുടംബത്തിനുമൊപ്പം കുറച്ച് സമയം ചിലവഴിക്കാൻ സാധിച്ചതിൽ വളരെ അധികം സന്തോഷമുണ്ട്. കാളിദാസിനെ മിസ് ചെയ്തു’- സഞ്ജു ഇൻസ്റ്റഗ്രാമിൽ കുറിച്ചു.
ഇപ്പോൾ നടന്നുവരുന്ന ന്യൂസിലാൻഡ് ഏ ടീമിനെതിരായ ഏകദിന പരമ്പരയിൽ ഇന്ത്യ എ ടീമിനെ നയിക്കുന്നത് സഞ്ജു സാംസണാണ്. ഈ മത്സരത്തിനായാണ് സഞ്ജു ചെന്നൈയിലെത്തിയത്. സഞ്ജുവിനൊപ്പം ഭാര്യയുമുണ്ട്. പരമ്പരയിലെ ആദ്യ മത്സരത്തിൽ ഇന്ത്യ വിജയം നേടിയിരുന്നു. ഏഴു വിക്കറ്റിന് ജയിച്ച മത്സരത്തിൽ സഞ്ജു 32 പന്തിൽ 29 റൺസെടുത്ത് പുറത്താകാതെ നിന്നു. മൂന്ന് മത്സരങ്ങളുള്ള ഏകദിന പരമ്പരയിൽ ഇന്ത്യ എ ടീം 1-0ന് മുന്നിലാണ്. രണ്ടാമത്തെ മത്സരം ഇന്ന് ചെപ്പോക്ക് സ്റ്റേഡിയത്തിൽ നടക്കുകയാണ്.
