ചാമ്പ്യന്സ് ലീഗിലെ ആദ്യമല്സരത്തില് മൂന്നിനെതിരെ ആറ് ഗോളിന്റെ ജയം നേടി മാഞ്ചസ്റ്റര് സിറ്റി.ലീഗിൽ പിഎസ്ജിക്ക് വേണ്ടിയും മെസിയുടെ ആദ്യമത്സരമായിരുന്നു. നെയ്മറും എംബാപ്പെയും മെസിയുമടങ്ങിയ ലോകോത്തര മുന്നേറ്റനിരയ്ക്ക് മത്സരത്തിൽ ഒരു ആവേശവും ഉണ്ടാക്കാനായില്ല. നെയ്മറും എംബാപ്പെയുമാണ് കാര്യമായി നിരാശപ്പെടുത്തിയത്.15ാം മിനിറ്റിൽ ആന്ദ്രേ ഹെറെയ്റയിലൂടെ പിഎസ്ജിയാണ് മുന്നിലെത്തിയത്. എന്നാൽ ഒന്നാം പകുതിയിൽ തന്നെ സമനില ഗോളും വന്നു. 27ാം മിനിറ്റിൽ ഹൻസ് വനകനാണ് എതിരാളികൾക്കായി ഗോൾവല ചലിപ്പിച്ചത്. ഫ്രഞ്ച് ലീഗിലെ കരുത്തരായ പിഎസ്ജിയേക്കാൾ എന്ത് കൊണ്ടും മികച്ച പ്രകടനമാണ് ബെൽജിയം ക്ലബ്ബായ ക്ലബ്ബ് ബ്രഗ്ഗ് പുറത്തെടുത്തത്.
ഗ്രൂപ്പ് എയിൽ തന്നെ നടന്ന മറ്റൊരു മത്സരത്തിൽ പ്രീമിയർ ലീഗ് ജേതാക്കളായ മാഞ്ചസ്റ്റർ സിറ്റിക്ക് തകർപ്പൻ വിജയം. ഗോൾമഴ കണ്ട മത്സരത്തിൽ മൂന്നിനെതിരെ ആറ് ഗോളുകൾക്കാണ് ആർബി ലെപ്സിഗിനെതിരെ സിറ്റിയുടെ വിജയം. ജർമ്മൻ ടീമായ ലെപ്സിഗിന് വേണ്ടി ക്രിസ്റ്റഫർ കുങ്കു ഹാട്രിക് നേടി. എത്തിഹാദ് സ്റ്റേഡിയത്തിൽ നടന്ന മത്സരം തീർത്തും ആവേശകരമായിരുന്നു. വിജയത്തോടെ മൂന്ന് പോയൻറ് നേടിയിരിക്കുകയാണ് സിറ്റി. ഗ്രൂപ്പ് ഘട്ടത്തിൽ തന്നെ ടീം പ്രതീക്ഷ നൽകുന്നത് സിറ്റി മാനേജർ പെപ് ഗ്വാർഡിയോളക്ക് വലിയ ആത്മവിശ്വാസം പകരുന്നുണ്ട്.
നതാൻ എയ്ക്, നോർദി മുകിലെ, റിയാദ് മഹ്റെസ്, ജാക്ക് ഗ്രീലിഷ്, ജാവോ കാൻസെലോ, ഗബ്രിയേൽ ജീസസ് എന്നിവരാണ് സിറ്റിയുടെ ഗോൾ സ്കോറർമാർ. ഹാട്രിക് നേടിയിട്ടും ടീം തോൽവി വഴങ്ങേണ്ടി വന്നതിൻെറ സങ്കടത്തിലാണ് ക്രിസ്റ്റഫർ കുങ്കു. ഒരു താരം ഹാട്രിക് നേടിയിട്ടും ടീം തോൽക്കേണ്ടി വരുന്നത് പ്രീമിയർ ലീഗിൻെറ ചരിത്രത്തിൽ ഇത് നാലാം തവണ മാത്രമാണ്.
മറ്റൊരു ത്രില്ലറിൽ പ്രീമിയർ ലീഗ് കരുത്തരായ ലിവർപൂൾ 3-2ന് ഇറ്റാലിയൻ ടീമായ എസി മിലാനെ പരാജയപ്പെടുത്തി. ആൻഫീൽഡിൽ നടന്ന മത്സരത്തിൽ നായകൻ ജോർദാൻ ഹെൻഡേഴ്സണും ലിവർപൂളിന് വേണ്ടി ഗോളടിച്ചു. സൂപ്പർതാരം മുഹമ്മദ് സലാ പെനാൽറ്റി പാഴാക്കിയത് ടീമിനെ ഞെട്ടിച്ചെങ്കിലും വിജയത്തിലെത്താൻ അവർക്ക് സാധിച്ചു. ആദ്യപകുതിയിൽ മത്സരം 2-1ന് ലിവർപൂൾ പിന്നിലായിരുന്നു. എന്നാൽ രണ്ടാം പകുതിയിൽ ആദ്യം മുഹമ്മദ് സലായും പിന്നീട് ഹെൻഡേഴ്സണും ഗോൾ നേടിയതോടെ ലിവർപൂൾ ജയം സ്വന്തമാക്കി.മറ്റൊരു മത്സരത്തിൽ 89ാം മിനിറ്റിൽ റോഡ്രിഗോ നേടിയ ഗോളിൻെറ ബലത്തിൽ റയൽ മാഡ്രിഡ് ഇൻറർ മിലാനെ എതിരില്ലാത്ത ഒരു ഗോളിന് തോൽപ്പിച്ചു. നിരവധി അവസരങ്ങൾ പാഴാക്കിയ ഇൻറർ മിലാൻ ചോദിച്ച് വാങ്ങിയ തോൽവിയായി മാറി. ജർമൻ ക്ലബ്ബായ ബൊറൂസിയ ഡോർട്ട്മുണ്ട് ഒന്നിനെതിരെ രണ്ട് ഗോളുകൾക്ക് ബെസിക്ടാസിനെയും പരാജയപ്പെടുത്തി. ഇംഗ്ലീഷ് മധ്യനിരതാരം ജൂഡ് ബെല്ലിങ്ങാമിൻെറ തകർപ്പൻ പ്രകടനമാണ് ഡോർട്ട്മുണ്ടിനെ വിജയത്തിലേക്ക് നയിച്ചത്.
