തിരുവനന്തപുരം: വിജിലൻസിലെ ‘ടി സെക്ഷനെ’ വിവരാവകാശ നിയമത്തിന്റെ പരിധിയിൽ നിന്ന് ഒഴിവാക്കിയ നടപടിയിൽ വ്യക്തത വരുത്തി ആഭ്യന്തരമന്ത്രി രമേശ് ചെന്നിത്തല. കഴിഞ്ഞ സർക്കാരിന്റെ കാലത്ത് വിജിലൻസ് ഡയറക്ടർ നൽകിയ ശുപാർശ അംഗീകരിക്കുകയാണ് ഇപ്പോഴത്തെ സർക്കാർ ചെയ്തതെന്ന് മന്ത്രി നിയമസഭയെ അറിയിച്ചു. കെ. കെ. വത്സരാജ് സഭയിൽ ഉന്നയിച്ച അടിയന്തര പ്രമേയത്തിന് മറുപടി നൽകുകയായിരുന്നു അദ്ദേഹം. വിവരാവകാശ നിയമത്തെ ദുർബലപ്പെടുത്താൻ സർക്കാരിന് യാതൊരു നീക്കവുമില്ലെന്നും അന്വേഷണത്തെ ബാധിക്കാത്ത തരത്തിൽ പൂർണ്ണമായ സുതാര്യത ഉറപ്പാക്കുമെന്നും മന്ത്രി നിയമസഭയിൽ വ്യക്തമാക്കി.
വിജിലൻസിലെ T1, T2 സെക്ഷനുകളെയാണ് വിവരാവകാശ നിയമത്തിൽ നിന്ന് താൽക്കാലികമായി ഒഴിവാക്കിയിരിക്കുന്നത്. വിവരാവകാശ നിയമത്തിൽ വെള്ളം ചേർക്കാൻ സർക്കാരിന് താല്പര്യമില്ലെന്ന് വ്യക്തമാക്കിയ ആഭ്യന്തരമന്ത്രി, എന്നാൽ രഹസ്യസ്വഭാവമുള്ള കേസുകളിലെ വിവരങ്ങളും രാജ്യസുരക്ഷ, ആഭ്യന്തരസുരക്ഷ എന്നിവയെ ബാധിക്കുന്ന നിർണായക വിവരങ്ങളും പുറത്തുവിടുന്നത് അന്വേഷണത്തെ ദോഷകരമായി ബാധിക്കുമെന്ന് ചൂണ്ടിക്കാട്ടി. കേസുകളുടെ വിവരങ്ങൾ ചോർന്നാൽ അതിന്റെ ആനുകൂല്യം കുറ്റാരോപിതർക്ക് ലഭിക്കുമെന്നും വിജിലൻസിന്റെ പൊതുവിവരങ്ങൾ നിലവിൽ വെബ്‌സൈറ്റിൽ പ്രസിദ്ധീകരിക്കുന്നുണ്ടെന്നും അദ്ദേഹം അടിയന്തര പ്രമേയത്തിന് മറുപടിയായി പറഞ്ഞു.
ഉന്നത വ്യക്തികളുടെ ഫയലുകളും രഹസ്യാന്വേഷണ വിവരങ്ങളും കൈകാര്യം ചെയ്യുന്ന സെക്ഷനാണ് ടി സെക്ഷൻ. അതേസമയം രാഷ്ട്രീയ നേതാക്കൾ ഉൾപ്പെടുന്ന കേസുകൾ അടക്കം ആർ.ടി.ഐ പരിധിയിൽ നിന്ന് മറയ്ക്കാനുള്ള നീക്കമാണിതെന്ന വിമർശനം ഇതിനകം ഉയർന്നിട്ടുണ്ട്. നേരത്തെ ആദ്യഘട്ടത്തിൽ ഒഴിവാക്കപ്പെട്ടിരുന്ന ഈ സെക്ഷൻ 2022-ൽ വീണ്ടും വിവരാവകാശ പരിധിയിൽ കൊണ്ടുവന്നിരുന്നെങ്കിലും, ഇപ്പോഴത്തെ പുതിയ വിജ്ഞാപനത്തിലൂടെ വീണ്ടും പുറത്താക്കുകയായിരുന്നു. പോലീസ് ആസ്ഥാനത്തെയും ക്രൈംബ്രാഞ്ചിലെയും ടി സെക്ഷനുകൾ നേരത്തെ തന്നെ ആർ.ടി.ഐ പരിധിക്ക് പുറത്താണ്.
