പത്തനംതിട്ട പുളിക്കീഴില് പിഞ്ചുകുഞ്ഞിന്റെ മൃതദേഹം ചതുപ്പിൽ കണ്ടെത്തിയ സംഭവത്തിൽ അന്വേഷണം ഊർജിതമാക്കി പോലീസ്. കുഞ്ഞിന്റെ പോസ്റ്റ്മോർട്ടം റിപ്പോർട്ടിൽ കൊലപാതകത്തിന് സാധ്യതയില്ലെന്ന് കണ്ടെത്തിയാതായി അന്വേഷണ ഉദ്യോഗസ്ഥർ പറഞ്ഞു.
മൃതദേഹത്തിന് അഞ്ചു ദിവസത്തെ പഴക്കമുണ്ടെന്ന് പോസ്റ്റ്മോർട്ടം റിപ്പോർട്ടിൽ വ്യക്തമാണ്. അതെ സമയം, കുഞ്ഞിന്റെ മാതാപിതാക്കളെ ഇത് വരെ കണ്ടത്താനായിട്ടില്ല.
പുളിക്കീഴ് ജംഗ്ഷനിലെ സിസിടിവികള് കേന്ദ്രീകരിച്ച് പരിശോധനകള് നടത്തിയെങ്കിലും സംഭവവുമായി ബന്ധപ്പെട്ട തെളിവുകള് ഒന്നും പൊലീസിന് ഇതുവരെ ലഭിച്ചിട്ടില്ല. സമീപ പ്രദേശങ്ങളിലെ സിസിടിവികള് കൂടി പരിശോധിക്കാന് അന്വേഷണസംഘം തീരുമാനിച്ചു. മൃതദേഹം കണ്ട സ്ഥലത്ത് വീണ്ടും പരിശോധന നടത്തിയെങ്കിലും കാര്യമായ തെളിവുകള് ഒന്നും കണ്ടെത്താന് ആയിട്ടില്ല.
ഫോറന്സിക് പരിശോധനാഫലം വന്നതിനു ശേഷം മാത്രമേ സംഭവം കൊലപാതകമാണ് എന്ന് ഉറപ്പിക്കാന് കഴിയൂ എന്നാണ് പൊലീസ് നിലപാട്. നാട്ടുകാരില് നിന്ന് ലഭിക്കുന്ന വിവരങ്ങള് അനുസരിച്ച് മുന്നോട്ടു പോവുകയാണ്. തിരുവല്ല ഡിവൈഎസ്പി എസ് അന്ഷാദിന്റെ നേതൃത്വത്തിലുള്ള പ്രത്യേക സംഘമാണ് കേസ് ഇപ്പോള് അന്വേഷിക്കുന്നത്.
