സംസ്ഥാനത്ത് അടുത്ത 5 ദിവസം വ്യാപകമായ മഴക്ക് സാധ്യത. ഈ ദിവസങ്ങളില് ഒറ്റപ്പെട്ട ശക്തമായ മഴയ്ക്കും ഇടിമിന്നലിനും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. തമിഴ്നാടിനും സമീപ പ്രദേശങ്ങള്ക്ക് മുകളിലായി ചക്രവാതചുഴി നിലനില്ക്കുന്നതിനാലാണ് ഇത്. തമിഴ്നാട് മുതല് പടിഞ്ഞാറന് വിദര്ഭ വരെ ന്യൂനമര്ദ പാത്തി നിലനില്ക്കുന്നു. കേരള- ലക്ഷദ്വീപ് തീരങ്ങളില് വെള്ളിയാഴ്ച വരെ മത്സ്യബന്ധനത്തിനു വിലക്കേര്പ്പെടുത്തി. 55 കി.മീ. വരെ വേഗത്തില് കാറ്റിനും സാധ്യതയുണ്ട്. എല്ലാ ജില്ലകളിലും യെല്ലോ അലര്ട്ട് പ്രഖ്യാപിച്ചിരിക്കുകയാണ്. ഉച്ചയ്ക്ക് ശേഷം മഴ ശക്തമാകുമെന്നും കാലാവസ്ഥ നിരീക്ഷണ കേന്ദ്രം അറിയിച്ചു.
അതേസമയം, മലമ്പുഴ ഡാമിന്റെ ഷട്ടറുകള് തുറന്നു. രാവിലെ 9നാണ് ഡാമിന്റെ നാല് ഷട്ടറുകളും തുറന്നത്. ഡാമിന്റെ താഴ് ഭാഗത്തുള്ള മുക്കൈപുഴ, കല്പ്പാത്തി പുഴ, ഭാരതപ്പുഴ എന്നിവയുടെ തീരത്ത് താമസിക്കുന്നവരും മീന്പിടുത്തക്കാരും ജാഗ്രത പാലിക്കണമെന്ന് എക്സിക്യൂട്ടീവ് എന്ജിനീയര് അറിയിച്ചു. കഴിഞ്ഞ 45 ദിവസത്തിനിടെ മൂന്നാം തവണയാണ് ഡാം തുറക്കുന്നത്.
കെഎസ്ഇബിയുടെ ഇടമലയാര്, കക്കി, ബാണാസുരസാഗര്, ഷോളയാര്, പൊന്മുടി, കുണ്ടള, ലോവര് പെരിയാര്, കല്ലാര്കുട്ടി, മൂഴിയാര് ഡാമുകളില് റെഡ് അലര്ട്ട് പ്രഖ്യാപിച്ചു. മാട്ടുപ്പെട്ടി, ആനയിറങ്കല്, പെരിങ്ങല്ക്കുത്ത് എന്നിവിടങ്ങളില് ഓറഞ്ച് അലര്ട്ടും ഇടുക്കിയിലും കുറ്റ്യാടിയിലും ബ്ലൂ അലര്ട്ടുമാണ്. ഇന്നും നാളെയും എല്ലാ ജില്ലകളിലും യെല്ലോ അലര്ട്ട് പ്രഖ്യാപിച്ചിരിക്കുകയാണ്.
