തിരുവനന്തപുരം : സംസ്ഥാനത്ത് കോവിഡിനെ തുടർന്നുള്ള സാമ്പത്തിക പ്രതിസന്ധി മറികടക്കാൻ സർക്കാർ ജീവനക്കാരുടെ ശമ്പളം മാറ്റിവെയ്ക്കുന്നതിനുള്ള മന്ത്രി സഭ ഓർഡിനൻസിൽ ഗവർണർ ആരിഫ് മുഹമ്മദ് ഖാൻ ഒപ്പു വെച്ചു. ജീവനക്കാരുടെ ശമ്പളം മാറ്റിവെക്കുന്നതിന് സർക്കാർ നേരത്തേ പുറപ്പെടുവിച്ച ഉത്തരവിന് നിയമപരമായി പിൻബലമില്ലെന്ന് ഹൈക്കോടതി ഉത്തരവ് പുറപ്പെടുവിപ്പിച്ചതിനെ പിന്നാലെ ആയിരുന്നു ഓർഡിനൻസ് പുറത്തിറക്കിയത്.
ഗവർണർ ഓർഡിനസിൽ ഒപ്പു വെച്ചതോടെ ജീവനക്കാരുടെ ശമ്പളം ഈ മാസം മുതൽ സർക്കാരിന് മാറ്റി വെക്കാവുന്നതാണ്. അടുത്ത ആറു മാസത്തിനുള്ളിൽ എന്ന് പണം തിരിച്ചു നൽകും എന്ന കാര്യം സർക്കാർ വ്യക്തമാക്കിയാൽ മതി. സർക്കാർ നടപടിയ്ക്കെതിരെ പ്രതിപക്ഷ സംഘടനകൾ വീണ്ടും കോടതിയിൽ പോകുമെന്ന് നേരത്തെ നേതാക്കൾ അറിയിച്ചിരുന്നു. കേരള ഡിസാസ്റ്റർ ആൻഡ് പബ്ലിക് എമർജൻസി സ്പെഷ്യൽ പ്രൊവിഷൻസ് ആക്ട് അനുസരിച്ചാണ് ഓർഡിനൻസ് പുറത്തിറക്കിയത്.
