സർക്കാർ നൽകിയ അധിക സമയം ഇന്നവസാനിക്കുന്നതോട് കൂടി സംസ്ഥാനത്തെ ഹോട്ടലുകൾ, റസ്റ്ററന്റുകൾ, ബേക്കറികൾ എന്നിവിടങ്ങളിലെ ജീവനക്കാർക്ക് നാളെ മുതൽ ഹെൽത്ത് കാർഡ് നിർബന്ധം. രണ്ട് തവണ നീട്ടിയ സമയം ഇന്നവസാനിക്കുന്നതോട് കൂടിയാണ് കാർഡ് നിർബന്ധമാക്കിയത്. നാളെ മുതൽ കർശന പരിശോധന ഉണ്ടാകുമെന്നും ഹെൽത്ത് കാർഡ് ഇല്ലാത്ത സ്ഥാപനങ്ങളുടെ ലൈസൻസ് റദ്ദാക്കുമെന്നുമാണ് അറിയിപ്പ്.
സംസ്ഥാനത്ത് ഭക്ഷണം പാകം ചെയ്യുന്നതും വിതരണം ചെയ്യുന്നതും വില്പന നടത്തുന്നതുമായ എല്ലാ സ്ഥാപനങ്ങളിലേയും ഭക്ഷ്യ വസ്തുക്കള് കൈകാര്യം ചെയ്യുന്ന ജീവനക്കാരാണ് ഹെൽത്ത് കാർഡ് എടുക്കേണ്ടത്.
രജിസ്റ്റേഡ് മെഡിക്കല് പ്രാക്ടീഷണറുടെ നിശ്ചിത മാതൃകയിലുള്ള സര്ട്ടിഫിക്കറ്റാണ് വേണ്ടത്,. ഡോക്ടറുടെ
നിർദേശ പ്രകാരം ശാരീരിക പരിശോധന, കാഴ്ചശക്തി പരിശോധന, ത്വക്ക് രോഗങ്ങള്, വൃണം, മുറിവ് എന്നിവയുണ്ടോയെന്ന പരിശോധന, വാക്സിനുകളെടുത്തിട്ടുണ്ടോ എന്ന പരിശാധന, പകര്ച്ചവ്യാധികളുണ്ടോ എന്നറിയുന്നതിനുള്ള രക്തപരിശോധന ഉള്പ്പെടെയുള്ള പരിശോധനകള് നടത്തണം.
ഒരു വർഷം കാലാവധിയുള്ള ഈ കാർഡിൽ ഡോക്ടറുടെ ഒപ്പും സീലും ഉണ്ടായിരിക്കണം. ഹെല്ത്ത് ഇന്സ്പെക്ടര്മാര് ശുചിത്വവും ഹെല്ത്ത് കാര്ഡും പരിശോധിക്കുന്നതാണ്. സ്ഥാപനങ്ങള് കൂടാതെ മാര്ക്കറ്റുകള് ചെക്ക് പോസ്റ്റുകള് എന്നിവിടങ്ങളിലും പൊതുജനങ്ങളുടെ പരാതി അനുസരിച്ചും അപ്രതീക്ഷിത പരിശോധനകള് നടത്തുന്നതാണ്.
