കോവിഡ് വാക്സിൻ ലഭിക്കുന്നതിനുള്ള മുൻഗണനാ പട്ടികയിലേക്ക് മൂന്ന് വിഭാഗങ്ങളെ കൂടി ഉൾപ്പെടുത്തി. സംസ്ഥാനത്ത് 18 വയസ് മുതല് 45 വയസുവരെ പ്രായമുള്ളവരുടെ വാക്സിനേഷന് മുന്ഗണനാ വിഭാഗത്തില് വിദേശത്ത് പഠിക്കാനും ജോലിയ്ക്കുമായി പോകുന്നവരെയും കൂടി ഉള്പ്പെടുത്തിയുള്ള ഉത്തരവ് പുറപ്പെടുവിച്ചതായി ആരോഗ്യ വകുപ്പ് മന്ത്രി വീണ ജോര്ജ് അറിയിച്ചു. ജനങ്ങളുമായി നേരിട്ട് ഇടപഴകുന്നു ഉദ്യോഗസ്ഥർക്കാണ് വിവിധ വകുപ്പുകളിൽ വാക്സിനേഷന് മുൻഗണന നൽകുന്നത്. മൂല്യനിർണയ ജോലിയിലുള്ള അധ്യാപകർ, എഫ്സിഐ, തപാൽ ജീവനക്കാർ, ഭക്ഷ്യം, പൊതുവിതരണം, സാമൂഹ്യനീതി, വനിതാ ശിശുക്ഷേമം, മൃഗസംരക്ഷണം, ഫിഷറീസ് എന്നീ വകുപ്പുകളെയാണ് ഉൾപ്പെടുത്തിയത്. എസ്എസ്എല്സി, എച്ച്എസ്സി, വിഎച്ച്എസ്എസി തുടങ്ങിയ പരീക്ഷാ മൂല്യനിര്ണയ ക്യാമ്പില് നിയമിച്ച അധ്യാപകരെയാണ് ഉൾപ്പെടുത്തിയത്. പോര്ട്ട് സ്റ്റാഫ്, കടല് യാത്രക്കാര് എന്നിവർക്കുമാണ് മുൻഗണന.
വിദേശത്ത് പഠിക്കാനും ജോലിയ്ക്കുമായി പോകുന്നവര്ക്ക് പല രാജ്യങ്ങളും വാക്സിനേഷന് നിര്ബന്ധമാക്കിയ സാഹചര്യത്തിലാണ് സര്ക്കാര് ഇക്കാര്യത്തില് അടിയന്തര തീരുമാനം എടുത്തത്. ഇതുള്പ്പെടെ 11 വിഭാഗങ്ങളെക്കൂടി വാക്സിനേഷന്റെ മുന്ഗണനാ വിഭാഗത്തില് ഉള്പ്പെടുത്തിയിട്ടുണ്ടെന്നും മന്ത്രി വ്യക്തമാക്കി.
32 വിഭാഗങ്ങളിലുള്ളവരെ കോവിഡ് മുന്നണി പോരാളികളായി പരിഗണിച്ച് 18 വയസ് മുതല് 45 വയസുവരെ പ്രായമുള്ള മുന്ഗണനാ വിഭാഗത്തില് നേരത്തെ ഉള്പ്പെടുത്തിയിരുന്നു. എങ്കിലും കൂടുതല് വിഭാഗക്കാരെ മുന്ഗണനാ വിഭാഗത്തില് ഉള്പ്പെടുത്തണമെന്നാവശ്യമുയര്ന്നു. ഇതിന്റെയടിസ്ഥാനത്തില് സംസ്ഥാനതല കമ്മിറ്റി യോഗം കൂടി നല്കിയ ശിപാര്ശയുടെ അടിസ്ഥാനത്തിലാണ് 11 വിഭാഗക്കാരെക്കൂടി ഉള്പ്പെടുത്തിയത്.
