ലഭ്യമാകുന്ന മുഴുവന് ഒഴിവുകളിലും റാങ്ക് ലിസ്റ്റുകളുടെ കാലാവധിക്കുള്ളില് പി.എസ്.സി നിയമനം നടത്തുകയെന്നതാണ് സര്ക്കാരിന്റെ നയമെന്ന് മുഖ്യമന്ത്രി. പ്രതിപക്ഷനേതാവ് വി.ഡി. സതീശന്റെ സബ്മിഷന് മറുപടിയായാണ് മുഖ്യമന്ത്രിയുടെ വാക്കുകള്. ഇതിനാവശ്യമായ സത്വര നടപടികള് സര്ക്കാരും നിയമനാധികാരികളും പബ്ലിക് സര്വ്വീസ് കമ്മീഷനും സ്വീകരിക്കുന്നുണ്ടെന്നും മുഖ്യമന്ത്രി വ്യക്തമാക്കി.
കൊവിഡ് വ്യാപനത്തെ തുടര്ന്ന് യഥാസമയം മത്സര പരീക്ഷകള് നടത്താന് പി.എസ്.സി.ക്ക് കഴിയാത്ത സാഹചര്യമുണ്ടായി. എന്നാല് ഒഴിവുകള് റിപ്പോര്ട്ട് ചെയ്യുന്നതിനെയും നിയമന ശിപാര്ശ നല്കുന്നതിനെയും ഇത് ബാധിക്കുന്നില്ല. മാത്രവുമല്ല, 05.02.2021നും 03.08.2021നുമിടയില് കാലാവധി പൂര്ത്തിയാക്കുന്ന വിവിധ റാങ്ക് ലിസ്റ്റുകളുടെ കാലാവധി 04.08.2021 വരെ ദീര്ഘിപ്പിച്ചിരുന്നു. മുഖ്യമന്ത്രി പറഞ്ഞു.
എല്ലാ ഒഴിവുകളും കൃത്യതയോടെ യഥാസമയം റിപ്പോര്ട്ട് ചെയ്യുന്നതിന് ഓണ്ലൈന് സംവിധാനം ഏര്പ്പെടുത്തിയിട്ടുണ്ട്.ഒഴിവുകള് റിപ്പോര്ട്ട് ചെയ്യുന്നതിന്റെ കൃത്യത പരിശോധിക്കുന്നതിനായി അഡ്മിനിസ്ട്രേറ്റീവ് വിജിലന്സ് വിവിധ ഓഫിസുകളില് പരിശോധന നടത്തുന്നുണ്ട്.
റാങ്ക് ലിസ്റ്റുകളുടെ കാലാവധി ആഗസ്റ്റ് 4ന് അവസാനിക്കുന്നത് കണക്കിലെടുത്ത് അതുവരെയുള്ള മുഴവന് ഒഴിവുകളും നിയമനാധികാരികള് പി.എസ്.സി.ക്ക് റിപ്പോര്ട്ട് ചെയ്യുന്നുണ്ടെന്ന് ഉറപ്പാക്കണമെന്നും ഇതിനായി സെക്രട്ടറിമാരുടെ യോഗം വിളിച്ച് ചുമതലപ്പെടുത്തണമെന്നും മന്ത്രിമാര്ക്ക് നിര്ദ്ദേശം നല്കിയിട്ടുണ്ട്. ഒഴിവുകള് റിപ്പോര്ട്ടുചെയ്യുന്നതില് വീഴ്ചവരുത്തുന്ന വകുപ്പു മേധാവികള്ക്കും നിയമനാധികാരികള്ക്കും എതിരെ കര്ശന നടപടി സ്വീകരിക്കുമെന്നും മുഖ്യമന്ത്രി പിണറായി വിജയന് സഭയില് വ്യക്തമാക്കി.
