കൊല്ലം ഓച്ചിറയില്‍ വീട്ടുവളപ്പില്‍ നട്ടുവളര്‍ത്തിയത് 38 കഞ്ചാവ് ചെടികള്‍ എക്സൈസ് പിടികൂടി. മേമന സ്വദേശികളായ മനീഷ്, അഖില്‍ കുമാര്‍ എന്നിവരാണ് പിടിയിലായത്. ഇവരുടെ പക്കല്‍ നിന്നും പത്തരക്കിലോ കഞ്ചാവും പിടികൂടി. വിദേശ ഇനം നായകളുടെ സംരക്ഷണയിലായിരുന്നു കഞ്ചാവ് കൃഷി.
വീട്ടില്‍ മറ്റ് കൃഷികളോടൊപ്പം 38 കഞ്ചാവ് ചെടികള്‍. അതും ചെടിച്ചട്ടിയില്‍ വളം നല്‍കി വെള്ളമൊഴിച്ച് പരിപാലിക്കല്‍. കഞ്ചാവ് ചെടികള്‍ക്ക് ഒന്നരമാസം പ്രായം. 40 സെന്റീമീറ്റര്‍ വളര്‍ച്ചയും. കഞ്ചാവ് കൃഷിയുടെ സംരക്ഷണത്തിന് 3 മുന്തിയ ഇനം വിദേശ നായകളെയും പ്രതികള്‍ വളര്‍ത്തി. കൊല്ലം എക്സൈസ് സംഘം പരിശോധനയ്ക്ക് ഇവരുടെ വീട്ടിലൊക്കെ എത്തിയപ്പോള്‍ ഈ നായ്ക്കളെയും പ്രതികള്‍ തുറന്നു വിട്ടു.
നേരത്തെ എംഡിഎംഐ കേസില്‍ ഉള്‍പ്പെട്ട ആളാണ് പ്രതികളിലൊരാളായ മനീഷ്. ഈ കേസ് അന്വേഷണം പുരോഗമിക്കവെയാണ് മനീഷും, സുഹൃത്ത് അഖില്‍ കുമാറും ചേര്‍ന്ന് അഖിലിന്റെ വീട്ടുവളപ്പില്‍ കഞ്ചാവ് കൃഷി നടത്തുന്നത് എക്സൈസ് കണ്ടെത്തിയത്.
