തിരൂരങ്ങാടി: പ്രവാസി അവഗണനക്കെതിരെ നന്നമ്പ്ര പഞ്ചായത്ത് മുസ് ലിം ലീഗ് കമ്മിറ്റി, കുണ്ടൂർ അത്താണിക്കലിൽ സംഘടിപ്പിച്ച മുസ്ലിം ലീഗ് പ്രതിഷേധ സംഗമം യൂത്ത് ലീഗ് സംസ്ഥാന പ്രസിഡന്റ് പാണക്കാട് സയ്യിദ് മുനവ്വർ അലി ശിഹാബ് തങ്ങൾ ഉദ്ഘാടനം ചെയ്തു. പ്രവാസികളുടെ നാട്ടിലെത്താനുള്ള അവകാശം നിഷേധിക്കുന്ന സംസ്ഥാന സർക്കാർ സമീപനം പ്രതിഷേധാർഹമാണെന്ന് തങ്ങൾ പറഞ്ഞു.
ചാര്ട്ടേഡ് ഫ്ളൈറ്റുകളില് വരുന്ന പ്രവാസികളുടെ വരവ് മുടക്കാന് അപ്രായോഗികമായ കോവിഡ് പരിശോധന നിര്ബന്ധമാക്കിയത് ഉള്പ്പെടെ സര്ക്കാര് നിരന്തരം പ്രവാസി ദ്രോഹം തുടരുകയാണെന്നും ഇതിനെതിരെ നിയമപരമായും രാഷ്ട്രീയമായും പോരാട്ടം തുടരുമെന്നും തങ്ങൾ പറഞ്ഞു.
ഗള്ഫ് രാജ്യങ്ങളില് കോവിഡ് ടെസ്റ്റിന്റെ ഫലം കിട്ടാന് വൈകും. അതിന് വലിയ തുക നൽകുകയും വേണം. ഇനി ഫലം ലഭിച്ചാല്തന്നെ 48 മണിക്കൂറിനകം ചാര്ട്ടേഡ് ഫ്ളൈറ്റ് പിടിച്ച് നാട്ടിലെത്തുക അസാധ്യവുമാണ്. ഈ സങ്കീര്ണത അറിഞ്ഞുകൊണ്ടു തന്നെയാണ് സര്ക്കാര് ഇത്തരമൊരു നീക്കവുമായി മുന്നോട്ടു വന്നതെന്നും തങ്ങൾ പറഞ്ഞു. വൈ. പ്രസിഡന്റ് ഫൈസൽ ബാഫഖി തങ്ങൾ പൊന്നാനി സംബസിച്ചു.
