ലഖ്നൗ: പ്രധാനമന്ത്രി നരേന്ദ്ര മോദിക്കെതിരെയും ഉത്തര് പ്രദേശ് മുഖ്യമന്ത്രി യോഗി ആദിത്യനാഥിനെതിരെയും വധഭീഷണി സന്ദേശം അയച്ച് 16 കാരന്. നോയിഡയിലാണ് സംഭവം. ഇ- മെയില് വഴിയാണ് 16 കാരനായ വിദ്യാര്ഥി ഒരു മീഡിയ ഹൗസിലേക്ക് സന്ദേശം അയച്ചത്. ഇതിനു പിന്നാലെ 16 കാരനെ പോലീസ് അറസ്റ്റ് ചെയ്തു.
ഏപ്രില് 5 ന് സെക്ടര് 20 പോലീസ് സ്റ്റേഷനില് കേസ് രജിസ്റ്റര് ചെയ്തിരുന്നു. പോലീസ് അന്വേഷിച്ചു വരികയായിരുന്നു. ഇ- മെയില് സന്ദേശത്തിന്റെ ഉറവിടം കണ്ടെത്താന് വേണ്ടി ടെക്നിക്കല് സംഘവും സഹായിച്ചതായി നോയിഡ എ.സി.പി. രജനീഷ് വര്മ പറഞ്ഞു.
ലഖ്നൗവിന് സമീപത്തുള്ള ചിന്ഹട്ടില് നിന്നാണ് സന്ദേശം അയച്ചതെന്ന് ഇ- മെയില് സന്ദേശത്തിന്റെ ഉറവിടം തേടിയുള്ള അന്വേഷണത്തില് കണ്ടെത്തി. തുടര്ന്ന്, വിദ്യാര്ഥിയിലേക്ക് അന്വേഷണം എത്തുകയും സന്ദേശം അയച്ചത് പ്ലസ് വണ് വിദ്യാര്ഥിയാണെന്ന് കണ്ടെത്തുകയായിരുന്നെന്ന് പോലീസ് ഉദ്യോഗസ്ഥനെ ഉദ്ധരിച്ച് പി.ടി.ഐ. റിപ്പോര്ട്ട് ചെയ്തു.
