തദ്ദേശ തെരഞ്ഞെടുപ്പ് മാറ്റിവയ്ക്കണമെന്ന പി സി ജോര്ജിന്റെ ഹര്ജി ഹൈക്കോടതി ഉത്തരവിനായി മാറ്റി. കൊവിഡ് പ്രോട്ടോകോള് പ്രകാരം തെരഞ്ഞെടുപ്പ് നടത്താന് സജ്ജമാണെന്ന് ഇലക്ഷന് കമ്മീഷന് കോടതിയെ അറിയിച്ചു. ചീഫ് ജസ്റ്റീസ് അധ്യക്ഷനായ ബെഞ്ചാണ് ഹര്ജി പരിഗണിച്ചത്.
കൊവിഡ് പശ്ചാത്തലത്തില് തദ്ദേശ തെരഞ്ഞെടുപ്പ് നീട്ടിവെക്കണമെന്നാവശ്യപ്പെട്ടാണ് പി സി ജോര്ജ് എംഎല്എ ഹൈക്കോടതിയെ സമീപിച്ചത്. തെരഞ്ഞെടുപ്പിന് വിജ്ഞാപനം പുറപ്പെടുവിക്കുന്നത് കോടതി സ്റ്റേ ചെയ്യണമെന്നാണ് ആവശ്യം. കൊവിഡ് വ്യാപനം രൂക്ഷമായിരിക്കുന്ന സമയത്ത് തെരഞ്ഞെടുപ്പ് നടത്തുന്നത് സംസ്ഥാനത്തെ ദുരന്തത്തിലേക്ക് തള്ളിവിടുമെന്നാണ് പി സി ജോര്ജ് ഹര്ജിയില് ചൂണ്ടിക്കാണിച്ചത്. കൊവിഡിനിടെ തെരഞ്ഞെടുപ്പ് നടത്തുന്നത് ജനങ്ങളുടെ ജീവിക്കാനുള്ള അവകാശത്തിന്മേല് ഉള്ള വെല്ലുവിളിയാണെന്നും തുടര്ച്ചയായി രണ്ട് തെരഞ്ഞെടുപ്പുകള് നടത്തുന്നത് സംസ്ഥാനത്തിന്റെ സാമ്പത്തികസ്ഥിതി തകര്ക്കുമെന്നും പി സി ജോര്ജ് ഹര്ജിയില് പറയുന്നു.
അതേസമയം, തദ്ദേശ സ്വയംഭരണ തെരഞ്ഞെടുപ്പുമായി ബന്ധപ്പെട്ട സുരക്ഷാ ക്രമീകരണങ്ങള് ചര്ച്ച ചെയ്യാനായി സംസ്ഥാന പൊലീസ് മേധാവി തെരഞ്ഞെടുപ്പ് കമ്മീഷനുമായി കൂടിക്കാഴ്ച നടത്തി. ഒറ്റഘട്ടമായി തെരഞ്ഞെടുപ്പ് നടത്തണമെന്നാണ് കമ്മീഷന്റെ താത്പര്യം. ഒരേ ദിവസം സംസ്ഥാനത്താകെ സുരക്ഷ ഏര്പ്പെടുത്തുന്നതില് പൊലീസ് അസൗകര്യം അറിയിച്ചാല് തെരഞ്ഞെടുപ്പ് രണ്ട് ഘട്ടമായി നടത്താനാണ് സാധ്യത. അതിനാല് തന്നെ കൂടിക്കാഴ്ച നിര്ണയാകണമാണ്. നിലവിലെ ക്രമസമാധാന സ്ഥിതിയും കൂടിക്കാഴ്ചയില് ചര്ച്ചയാകും. കൊവിഡ് മാനദണ്ഡങ്ങള് പാലിച്ച് പ്രചാരണവും പൊതുയോഗങ്ങളും നടത്തണമെന്നാണ് കമ്മീഷന്റെ നിര്ദ്ദേശം. ഇതിന് മേല്നോട്ടം വഹിക്കേണ്ടത് പൊലീസാണ്. ഡിസംബര് 31നകം തെരഞ്ഞെടുപ്പ് നടപടികള് പൂര്ത്തിയാക്കുമെന്ന് കമ്മീഷന് സര്ക്കാരിനെ അറിയിച്ചിട്ടുണ്ട്.
