ഷൊര്ണൂരില് ആംബുലന്സിന് മുകളിലേക്ക് വൈദ്യുതി തൂണ് പൊട്ടിവീണു; ഡ്രൈവര് ഉള്പ്പെടെയുള്ളവര് രക്ഷപ്പെട്ടത് തലനാരിഴയ്ക്ക്
പാലക്കാട്: പാലക്കാട് ഷൊര്ണൂരില് ആംബുലന്സിന് മുകളിലേക്ക് വൈദ്യുതി തൂണ് പൊട്ടിവീണ് അപകടം. ഷൊര്ണൂര് കണയത്ത് മൃതദേഹവുമായി പോവുകയായിരുന്ന ആംബുലന്സിന് മുകളിലേക്കാണ് വൈദ്യുതി തൂണ് പൊട്ടിവീണ് അപകടം ഉണ്ടായത്. കുളപ്പുള്ളിയില് നിന്നും കണയം വഴി വല്ലപ്പുഴക്ക് പോകുന്ന റോഡില് മണ്ണാരംപാറയില് പുലര്ച്ചക്ക് 4: 30 നായിരുന്നു അപകടം. കണ്ടെയ്നര് ലോറി വൈദ്യുത ലൈനില് കൊളുത്തി വലിച്ചതോടെ നാല് തൂണുകള് തകര്ന്നു വീഴുകയായിരുന്നു. ഇതില് ഒരു പോസ്റ്റാണ് ആംബുലന്സിന്റെ മുകളില് വന്ന് വീണത്. ഡ്രൈവര് ഉള്പ്പെടെ ആംബുലന്സിനുള്ളിലുണ്ടായിരുന്നവര് ഷോക്കേല്ക്കാതെ രക്ഷപ്പെട്ടു.
