ന്യൂഡല്ഹി: വിമാന ജീവനക്കാരുടെ ഡ്യൂട്ടി ക്രമീകരണവുമായി ബന്ധപ്പെട്ട് ആവര്ത്തിച്ചുള്ള ഗുരുതരമായ ലംഘനങ്ങള് കണ്ടെത്തിയതിനെ തുടര്ന്ന് എയര് ഇന്ത്യയിലെ മൂന്ന് ഉന്നത ഉദ്യോഗസ്ഥര്ക്കെതിരെ അടിയന്തര നടപടിക്ക് വ്യോമയാന റെഗുലേറ്ററായ ഡയറക്ടറേറ്റ് ജനറല് ഓഫ് സിവില് ഏവിയേഷന് (ഡിജിസിഎ) ഉത്തരവിട്ടു. എയര് ഇന്ത്യ സ്വമേധയാ വീഴ്ചകള് വെളിപ്പെടുത്തിയതോടെയാണ് ഡിജിസിഎ കടുത്ത നടപടി സ്വീകരിച്ചത്.
നിര്ബന്ധിത ലൈസന്സിംഗ്, വിശ്രമം, പ്രവര്ത്തന പരിചയം എന്നിവ സംബന്ധിച്ച മാനദണ്ഡങ്ങള് പാലിക്കാതെ തന്നെ വിമാനജീവനക്കാരെ ഷെഡ്യൂള് ചെയ്യുകയും പറക്കാന് അനുവദിക്കുകയും ചെയ്തുവെന്ന് എയര് ഇന്ത്യ സമ്മതിക്കുകയായിരുന്നു. എആര്എംഎസ് (ഏവിയേഷന് റിസോഴ്സ് മാനേജ്മെന്റ് സിസ്റ്റം) സിസ്റ്റത്തില് നിന്ന് സിഎഇ ഫ്ലൈറ്റ് ആന്ഡ് ക്രൂ മാനേജ്മെന്റ് സിസ്റ്റത്തിലേക്കുള്ള മാറ്റത്തിന് ശേഷമുള്ള പരിശോധനയിലാണ് ഈ ലംഘനങ്ങള് കണ്ടെത്തിയത്.
കമ്പനി സ്വമേധയാ വെളിപ്പെടുത്തിയ വിവരങ്ങള് ജീവനക്കാരുടെ ഷെഡ്യൂളിംഗ്, പാലിക്കല് നിരീക്ഷണം, ആഭ്യന്തര ഉത്തരവാദിത്തം എന്നിവയിലെ വ്യവസ്ഥാപിത പിഴവുകളിലേക്ക് വിരല് ചൂണ്ടുന്നു. ഈ പ്രവര്ത്തനപരമായ വീഴ്ചകള്ക്ക് നേരിട്ട് ഉത്തരവാദികളായ പ്രധാന ഉദ്യോഗസ്ഥര്ക്കെതിരെ കര്ശനമായ അച്ചടക്ക നടപടികളില്ലാത്തത് പ്രത്യേക ആശങ്കയുണ്ടാക്കുന്നതാണെന്ന് ജൂണ് 20ലെ ഉത്തരവില് പറയുന്നു.
