തിരുവനന്തപുരം: വ്രതശുദ്ധിയുടെ ദിനരാത്രങ്ങള്ക്ക് ശേഷം ഇസ്ലാം മത വിശ്വാസികള്ക്ക് ഇന്ന് ചെറിയ പെരുന്നാള്. ഒന്നിച്ചുകൂടി ബന്ധങ്ങള് പുതുക്കിയും പുതുവസ്ത്രങ്ങളണിഞ്ഞും രുചി വിളമ്പിയും ആഘോഷിക്കുകയാണ് വിശ്വാസികള്. സംസ്ഥാനത്തെ വിവിധ ജില്ലകളില് ഈദ്ഗാഹുകള് നടന്നു. ലഹരി വിരുദ്ധ സന്ദേശമുയര്ത്തിയാണ് ഈദ്ഗാഹുകള് സംഘടിപ്പിച്ചത്. ലഹരിവിരുദ്ധ പ്രചാരണങ്ങളെ ഇസ്ലാമിക സമൂഹം പിന്തുണയ്ക്കണമെന്ന് പാളയം ഇമാം പറഞ്ഞു. കുറ്റകൃത്യങ്ങളില് ഏര്പ്പെടുന്നവരുമായും സഹകരിക്കരുത്. ലഹരിവിരുദ്ധ പ്രചാരണങ്ങളില് വിശ്വാസി സമൂഹം മുന്പന്തിയില് നില്ക്കണമെന്നും പാളയം ഇമാം വ്യക്തമാക്കി.
മലപ്പുറം മാഅദിന് മസ്ജിദിലെ പെരുന്നാള് നമസ്കാരത്തില് ഇബ്രാഹീമുല് ഖലീല് അല് ബുഖാരി തങ്ങള് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. കോഴിക്കോട് ബീച്ചിലെ സംയുക്ത ഈദ് ഗഹില് എം അഹമ്മദ് കുട്ടി മദനി പെരുന്നാള് സന്ദേശം നല്കി.
