മുംബൈ: ഹണിമൂണ് ആഘോഷത്തിനിടെ കോട്ടയുടെ മുകളില് നിന്ന് സെല്ഫിയെടുക്കാന് ശ്രമിച്ച നവവധു വീണ് മരിച്ചു. പൂനെയില് നിന്നുള്ള 24 കാരിയായ ശുഭാംഗി പട്ടേലാണ് മരിച്ചത്. വ്യാഴാഴ്ച ഉച്ചയ്ക്ക് സെല്ഫി എടുക്കുന്നതിനിടെ പ്രബല്ഗഡ് കോട്ടയുടെ മുകളില് നിന്ന് 200 അടി താഴ്ചയിലേക്ക് തെന്നിവീഴുകയായിരുന്നു. പൂനെയിലെ ദത്തവാഡി സ്വദേശിയാണ് ശുഭാംഗി. ഡിസംബര് എട്ടിനാണ് ശുഭാംഗിയും സോഫ്റ്റ്വെയര് എഞ്ചിനീയറായ വിനായക് പട്ടേലും (27) വിവാഹിതരായത്.
ബുധനാഴ്ച ഹണിമൂണിനായി ലോണാവാലയിലേക്ക് പുറപ്പെട്ട ഇവര് വ്യാഴാഴ്ച രാവിലെ മച്ചി പ്രബല്ഗഡ് കോട്ടയിലേക്ക് ട്രെക്കിംഗിനായി പോയി. ഉച്ചയ്ക്ക് 2.30 ഓടെ, കോട്ടയുടെ മുകളില് എത്തിയ ശേഷം, ശിവാംഗി മലയിടുക്കിന്റെ അരികില് നില്ക്കുമ്പോള് സെല്ഫി എടുക്കാന് തുടങ്ങി. ഈ സമയത്ത് അവള് അബദ്ധത്തില് വഴുതി കൊക്കയിലേക്ക് വീഴുകയായിരുന്നുവെന്ന് ഭര്ത്താവ് വിനായക് പൊലീസിനോട് പറഞ്ഞു.
നിസര്ഗ മിത്ര എന്ന പ്രാദേശിക എന്.ജി.ഒ.യുടെ കോട്ടയിലെ ട്രെക്കര്മാരും റെസ്ക്യൂ ടീം അംഗങ്ങളും കയറുകളും സുരക്ഷാ വലകളും ഉപയോഗിച്ച് തിരച്ചില് നടത്തി. ഏകദേശം 200 അടി താഴ്ച്ചയില്, ശരീരത്തില് ഒന്നിലധികം മുറിവുകളോടെ ശുഭാംഗിയെ കണ്ടെത്തി. ഉടന് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. പന്വേല് താലൂക്ക് പൊലീസ് അസ്വാഭാവിക മരണത്തിന് കേസെടുത്തു.
