തിരുവനന്തപുരം: മോഹന്ലാല് ചിത്രമായ എംപുരാനെ തള്ളി ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. എംപുരാന് കാണില്ലെന്നും ഇത്തരത്തിലുള്ള സിനിമാനിര്മ്മാണത്തില് നിരാശയുണ്ടെന്നും അദ്ദേഹം വ്യക്തമാക്കി. മോഹന്ലാല് ആരാധകരും അസ്വസ്ഥരാണെന്നും അദ്ദേഹം ഫേസ്ബുക്കില് പങ്കുവെച്ച പോസ്റ്റില് പറഞ്ഞു.
ലൂസിഫര് ഇഷ്ടപ്പെട്ടിരുന്നുവെന്നും അതിന്റെ തുടര്ച്ചയാണെന്ന് കേട്ടപ്പോള് എംപുരാന് കാണുമെന്ന് താന് പറഞ്ഞിരുന്നതായും രാജീവ് ചന്ദ്രശേഖര് കുറിച്ചു. ഇപ്പോള് സിനിമയുടെ നിര്മ്മാതാക്കള് തന്നെ സിനിമയില് 17 ഭേദഗതികള് വരുത്തിയിട്ടുണ്ടെന്നും ചിത്രം വീണ്ടും സെന്സര്ഷിപ്പിന് വിധേയമാകുന്നുണ്ടെന്നും എനിക്ക് മനസ്സിലായി. മോഹന്ലാല് ആരാധകരെയും മറ്റ് പ്രേക്ഷകരെയും അസ്വസ്ഥരാക്കുന്ന വിഷയങ്ങള് സിനിമയിലുണ്ടെന്ന് തനിക്ക് മനസ്സിലായി. സത്യം വളച്ചൊടിച്ച് ഒരു കഥ കെട്ടിപ്പടുക്കാന് ശ്രമിക്കുന്ന ഏതൊരു സിനിമയും പരാജയപ്പെടുക തന്നെ ചെയ്യുമെന്നും ബിജെപി സംസ്ഥാന അധ്യക്ഷന് കൂട്ടിച്ചേര്ത്തു. ചിത്രത്തിന്റെ ഉള്ളടക്കം പുറത്ത് വരുന്നതിന് മുന്പ് എംപുരാന് കാണുമെന്ന് രാജീവ് ചന്ദ്രശേഖര് ഫേസ്ബുക്കില് കുറിച്ചിരുന്നു.
രാജീവ് ചന്ദ്രശേഖറിന്റെ കുറിപ്പിന്റെ പൂര്ണ രൂപം:
ലൂസിഫര് കണ്ടിരുന്നു, എനിക്ക് അത് ഇഷ്ടപ്പെട്ടു. ലൂസിഫറിന്റെ തുടര്ച്ചയാണെന്ന് കേട്ടപ്പോള് എമ്പുരാന് കാണുമെന്ന് ഞാന് പറഞ്ഞിരുന്നു.
എന്നാല് ഇപ്പോള് സിനിമയുടെ നിര്മ്മാതാക്കള് തന്നെ സിനിമയില് 17 ഭേദഗതികള് വരുത്തിയിട്ടുണ്ടെന്നും ചിത്രം വീണ്ടും സെന്സര്ഷിപ്പിന് വിധേയമാകുന്നുണ്ടെന്നും എനിക്ക് മനസ്സിലായി. മോഹന്ലാല് ആരാധകരെയും മറ്റ് പ്രേക്ഷകരെയും അസ്വസ്ഥരാക്കുന്ന വിഷയങ്ങള് സിനിമയിലുണ്ടെന്ന് എനിക്ക് മനസ്സിലായി.
ഒരു സിനിമയെ ഒരു സിനിമയായി കാണണം. അതിനെ ചരിത്രമായി കാണാന് കഴിയില്ല. സത്യം വളച്ചൊടിച്ച് ഒരു കഥ കെട്ടിപ്പടുക്കാന് ശ്രമിക്കുന്ന ഏതൊരു സിനിമയും പരാജയപ്പെടുക തന്നെ ചെയ്യും.
അപ്പോള്, ലൂസിഫറിന്റെ ഈ തുടര്ച്ച ഞാന് കാണുമോ?- ഇല്ല.
ഇത്തരത്തിലുള്ള സിനിമാനിര്മ്മാണത്തില് ഞാന് നിരാശനാണോ? – അതെ.
