ലഹരി ഇടപാടുമായി ബന്ധപ്പെട്ട കള്ളപ്പണം വെളുപ്പിക്കല് കേസില് ബിനീഷ് കോടിയേരിക്ക് ജാമ്യം. നാളേയ്ക്ക് അറസ്റ്റിലായി ഒരു വര്ഷം പൂര്ത്തിയാകാനിരിക്കെയാണ് ജാമ്യം. എന്ഫോഴ്സ്മെന്റ് ഡയറക്ടറേറ്റ് അന്വേഷിക്കുന്ന കേസില് നാലാം പ്രതിയാണ് ബിനീഷ്.
കഴിഞ്ഞ ഡിസംബറിലും ഈ ഫെബ്രുവരിയിലും വിചാരണക്കോടതി ജാമ്യഹരജി തള്ളിയതിനെ തുടര്ന്ന് ബിനീഷ് മാര്ച്ചില് കര്ണാടക ഹൈക്കോടതിയെ സമീപിച്ചിരുന്നു. 7 മാസത്തിനിടെ 3 ബെഞ്ചുകള് വാദം കേട്ടെങ്കിലും തീരുമാനമായിരുന്നില്ല. ഒടുവില് നടന്ന വാദം ഈ മാസം 7ാം തിയതിയായിരുന്നു പൂര്ത്തിയായത്. അതേസമയം കള്ളപ്പണം വെളുപ്പിക്കല് കേസിന്റെ വിചാരണ പ്രത്യേക കോടതിയില് പുരോഗമിക്കുകയാണ്
2020 ഓഗസ്റ്റില് കൊച്ചി സ്വദേശി അനൂപ് മുഹമ്മദ്, തൃശൂര് സ്വദേശി റിജേഷ് രവീന്ദ്രന്, കന്നഡ സീരിയല് നടി ഡി.അനിഖ എന്നിവരെ ലഹരിക്കേസില് നര്കോട്ടിക്സ് കണ്ട്രോള് ബ്യൂറോ അറസ്റ്റ് ചെയതതോടെയായിരുന്നു കേസിന്റെ തുടക്കം.
അനൂപിനെ ചോദ്യം ചെയ്തപ്പോള് ആദായ നികുതി നല്കാതെയുള്ള ഇടപാടുകളെക്കുറിച്ചു സൂചന ലഭിക്കുകയും ബിനീഷിന്റെ പേര് ഉയര്ന്നു വരികയും ചെയ്തതോടെ ഇ.ഡി കേസ് രജിസ്റ്റര് ചെയ്യുകയായിരുന്നു. അനൂപുമായി പരിചയമുണ്ടെന്നും ബെംഗളൂരുവില് ഹോട്ടല് നടത്താനായി പണം വായ്പ നല്കിയതല്ലാതെ മറ്റ് ഇടപാടുകളില്ലെന്നും ബിനീഷ് മൊഴി നല്കിയെങ്കിലും അക്കൗണ്ടുകളിലെ പണമിടപാട് ചൂണ്ടിക്കാട്ടി ഇ.ഡി ബിനീഷിനെ അറസ്റ്റ് ചെയ്യുകയായിരുന്നു.
അതിനിടെ, ചില ലഹരി പാര്ട്ടികളില് അനൂപിനൊപ്പം ബിനീഷും പങ്കെടുത്തിട്ടുണ്ടെന്നു സാക്ഷികള് മൊഴി നല്കി. ബിനീഷിന്റെ തിരുവനന്തപുരത്തെ വീട്ടില് നടന്ന റെയ്ഡില് അനൂപിന്റെ ഡെബിറ്റ് കാര്ഡ് കണ്ടെടുത്തിരുന്നതായി ഇ.ഡി പറഞ്ഞിരുന്നു. കാര്ഡിനു പിന്നില് ബിനീഷിന്റെ ഒപ്പായിരുന്നെന്നാണ് ഉദ്യോഗസ്ഥര് വാദിച്ചത്.
അനൂപ് ബിനീഷിന്റെ ബിനാമിയാണെന്നും ബിനീഷ് ഡയറക്ടറായ ബീക്യാപിറ്റല് ഫോറെക്സ് ട്രേഡിങ്, ബീക്യാപിറ്റല് ഫിനാന്ഷ്യല് സര്വീസസ് എന്നിവ കടലാസ് കമ്പനികളാണെന്നും ഇ.ഡി അറിയിച്ചിരുന്നു.
എന്നാല് ബിസിനസ്, സിനിമ എന്നിവയില്നിന്നുള്ള വരുമാനമാണ് അക്കൗണ്ടിലുള്ളതെന്നും അനൂപുമായി മറ്റ് ഇടപാടുകളില്ലെന്നും ബിനീഷ് വാദിച്ചിരുന്നു. 14 ദിവസം ഇ.ഡി കസ്റ്റഡിയില് ചോദ്യം ചെയ്തതിനു ശേഷം നവംബര് 11 മുതല് ബെംഗളൂരു പരപ്പന അഗ്രഹാര സെന്ട്രല് ജയിലിലാണ് ബിനീഷ്. അനൂപും റിജേഷും ഇതേ ജയിലിലുണ്ട്.
