കേന്ദ്ര തൊഴില് നയങ്ങള്ക്കെതിരെ, പ്രഖ്യാപിച്ച 48 മണിക്കൂര് ദേശീയ പണിമുടക്കിൽ വലഞ്ഞ് സംസ്ഥാനം.മോട്ടോര് വാഹന തൊഴിലാളികള്, ബാങ്ക്, ഇന്ഷുറന്സ്, റെയില്വേ, വൈദ്യുതി തുടങ്ങിയ മേഖലകളിലെ തൊഴിലാളികള് പണിമുടക്കില് പങ്കെടുക്കുന്നതോടെ സാധാരണ ജീവിതത്തെ സമരം സാരമായി ബാധിക്കുന്നുണ്ട്.നഗരഗ്രാമ വ്യത്യാസമില്ലാതെ അടഞ്ഞുകിടക്കുകയാണ് കേരളം. കടകൾ തുറന്നത് അടപ്പിക്കുന്നുണ്ട്, ജോലിയെടുക്കാൻ വന്നവരെ തിരിച്ചയക്കുന്നുണ്ട്. എന്നാൽ മുംബൈയും ദില്ലിയും ബെംഗളൂരുവുമുൾപ്പെടെ രാജ്യത്തെ വൻ നഗരങ്ങളിലെല്ലാം ജനജീവിതം ഒരു തടസ്സവുമില്ലാതെ നീങ്ങുകയുമാണ്.തൊഴിലാളി വിരുദ്ധ നയങ്ങള് കേന്ദ്ര സര്ക്കാര് പിന്വലിക്കുക എന്ന ആവശ്യമുന്നയിച്ചാണ് പണിമുടക്കിന് ആഹ്വാനം ചെയ്തിരിക്കുന്നത്. എല്.ഐ.സി ഉള്പ്പടെയുള്ള പൊതുമേഖലാ സ്ഥാപനങ്ങള് വിറ്റഴിക്കുന്നതിനെതിരെയാണ് പണിമുടക്കിലുയര്ത്തുന്ന പ്രധാന പ്രതിഷേധം.തിരുവനന്തപുരത്ത് സര്ക്കാര് ഓഫീസുകള് പൂര്ണമായും അടഞ്ഞു കിടക്കുകയാണ്. തമ്പാനൂര് റെയില്വേ സ്റ്റേഷനുമുന്നില് കുടുങ്ങിയ യാത്രക്കാര്ക്ക് ആശുപത്രികള് അടക്കമുള്ള സ്ഥലങ്ങളിലെത്താന് പോലീസ് വാഹനങ്ങള് ഏര്പ്പെടുത്തിയിട്ടുണ്ട്. സന്നദ്ധ പ്രവര്ത്തകര് അടക്കം വാഹനങ്ങളുമായെത്തി ആര്.സി.സിയിലേക്കും മറ്റും പോകേണ്ടവരെ സഹായിക്കുന്നുണ്ട്. തിരുവനന്തപുരത്ത് ആര്.സി.സിയിലേക്ക് മാത്രമാണ് കെ.എസ്.ആര്.ടി.സി സര്വീസ് നടത്തുന്നത്. ചുരുക്കം ചില ടാക്സികള് മാത്രമാണ് തലസ്ഥാന നഗരത്തില് സര്വീസ് നടത്തുന്നത്.
തൊഴിലാളികളുടെ അവകാശം നിഷേധിക്കുന്ന തൊഴില് നിയമങ്ങള് പിന്വലിക്കുക, അസംഘടിതമേഖലയിലെ തൊഴിലാളികള്ക്ക് സാമൂഹ്യസുരക്ഷാ പദ്ധതി നടപ്പാക്കുക, തൊഴിലുറപ്പ് പദ്ധതി വിഹിതം കൂട്ടുക, കൂടുതല് കാര്ഷിക ഉത്പന്നങ്ങള്ക്ക് താങ്ങുവില ഉറപ്പാക്കുക, നിലവിലുള്ളവയ്ക്ക് താങ്ങുവില കൂട്ടുക, കര്ഷകസംഘടനകള് വിവിധ ആവശ്യങ്ങളുന്നയിച്ച് പുറത്തിറക്കിയ അവകാശപത്രിക അംഗീകരിക്കുക എന്നിവയാണ് സമരത്തിലെ പ്രധാന ആവശ്യങ്ങള്
