തിരുവനന്തപുരം: സംസ്ഥാനത്ത് ഇന്നും കനത്ത മഴ തുടരുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. അതിശക്തമായ മഴയ്ക്കുള്ള സാധ്യത മുന്നിര്ത്തി വയനാട്, കണ്ണൂര് ജില്ലകളില് നിന്ന് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. എറണാകുളം, ഇടുക്കി, തൃശൂര്, പാലക്കാട്, കോഴിക്കോട്, മലപ്പുറം, കാസര്ഗോഡ് ജില്ലകളില് യെല്ലോ അലര്ട്ടും നല്കിയിട്ടുണ്ട്.
ആന്ധ്രാ തീരം മുതല് കേരളതീരം വരെ സ്ഥിതി ചെയ്യുന്ന ന്യൂനമര്ദ പാത്തിയുടെയും മണിക്കൂറില് 65 കിലോമീറ്റര് വരെ വേഗതയില് വീശുന്ന കാലവര്ഷക്കാറ്റിന്റേയും സ്വാധീന ഫലമായാണ് നിലവിലെ മഴ. ഉയര്ന്ന തിരമാലയ്ക്കും കടലാക്രമണത്തിനും സാധ്യതയുള്ളതിനാല് കേരള, കര്ണാടക, ലക്ഷദ്വീപ് തീരങ്ങളില് നിന്ന് മത്സ്യബന്ധനത്തിനും വിലക്ക് ഏര്പ്പെടുത്തി.
അതേസമയം, ശക്തമായ മഴ കണക്കിലെടുത്ത് വയനാട്, പത്തനംതിട്ട, ഇടുക്കി, കോട്ടയം, എറണാകുളം, ആലപ്പുഴ ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ഇന്ന് അവധി പ്രഖ്യാപിച്ചിട്ടുണ്ട്. മഴ തുടരുന്ന സാഹചര്യത്തില് മലയോര മേഖലകളില് പ്രത്യേക ജാഗ്രത തുടരണമെന്നും നിര്ദേശമുണ്ട്.
