കണ്ണൂർ: വന്ദേ ഭാരത് എക്സ്പ്രസിൽ ചോർച്ച. പ്രധാനമന്ത്രി നരേന്ദ്ര മോദി തിരുവനന്തപുരം തമ്പാനൂരിൽ നിന്നും ഫ്ളാഗ് ഓഫ് ചെയ്ത വന്ദേ ഭാരത് എക്സ്പ്രസ് ട്രെയിനിലെ എ.സി ഗ്രില്ലിലാണ് ചോർച്ച കണ്ടെത്തിയത്. ബുധനാഴ്ച 2.30ന് കാസർകോട് നിന്നും സർവീസ് ആരംഭിക്കേണ്ട ട്രെയിനാണിത്.
പുലർച്ചെ പെയ്ത മഴയിൽ വന്ദേ ഭാരത് എക്സ്പ്രസിൻ്റെ രണ്ടു കോച്ചുകൾ പൂർണമായും ചോർന്നൊലിക്കുകയായിരുന്നു. എക്സ്പ്രസിന്റെ പിറകിലെയും മധ്യഭാഗത്തെയും ഓരോ കോച്ചിലാണ് ചോർച്ച കണ്ടെത്തിയത്. ഇതേത്തുടർന്ന് കണ്ണൂരിൽ തന്നെ നിർത്തിയിട്ട ട്രെയിൻ്റെ അറ്റകുറ്റപണി നടത്തി പ്രശ്നം പരിഹരിച്ചു.
ചൊവ്വാഴ്ച കാസർകോട് ആദ്യ സർവീസ് അവസാനിച്ച ട്രെയിൻ അതീവ സുരക്ഷയ്ക്കായി കണ്ണൂരിൽ എത്തിച്ചതാണ്. എ.സി ഗ്രില്ലിന്റെ ചോർച്ചയാണ് കാരണമെന്നും ഇതു പരിഹരിച്ചതായും റെയിൽവെ അധികൃതർ അറിയിച്ചു. ഇന്നലെ രാത്രി റെയിൽവേ സ്റ്റേഷനിൽ മഴ പെയ്തിട്ടില്ലെന്നും മേൽക്കുരയിൽ ചോർച്ചയുണ്ടായിട്ടില്ലെന്നുമാണ് റെയിൽ അധികൃതരുടെ വിശദീകരണം.
