കോവിഡ് 19 രോഗ പ്രതിരോധത്തിന്റെ ഭാഗമായി രാജ്യത്ത് സമ്പൂര്ണ ലോക്ക് ഡൗണ് പ്രഖ്യാപിച്ച സാഹചര്യത്തില് 1,70,000 കോടിയുടെ സാമ്പത്തിക പാക്കേജ് പ്രഖ്യാപിച്ച് ധനമന്ത്രി നിര്മല സീതാരാമന്. ഗ്രാമങ്ങളിലും നഗരങ്ങളിലും ഉള്ള പാവപ്പെട്ടവര്ക്കും ഇതര സംസ്ഥാന തൊഴിലാളികള്ക്കുമായാണു പാക്കേജ് പ്രഖ്യാപിച്ചത്. ഒരാളും വിശന്നിരിക്കേണ്ടിവരില്ലെന്നും ധനമന്ത്രി പറഞ്ഞു.
ആശുപത്രികളിലെ ജീവനക്കാര്ക്ക് ആരോഗ്യ ഇന്ഷുറന്സും പ്രഖ്യാപിച്ചു. ഒരു ജീവനക്കാരന് 50 ലക്ഷം രൂപയുടെ കവറേജ് ലഭിക്കും. മൂന്ന് മാസത്തേക്കാണ് ഇന്ഷുറന്സ്. ഇതിനകം കൊറോണ വൈറസ് നിയന്ത്രണ വിധേയമാകുമെന്നാണു കരുതുന്നതെന്നും മന്ത്രി പറഞ്ഞു.
നിലവില് ഒരോ ആള്ക്കും അഞ്ച് കിലോ വീതം അരിയും ഗോതമ്പും അനുവദിച്ചിട്ടുണ്ട്. ഇതിനു പുറമേ അഞ്ച് കിലോ ധാന്യം കൂടി സൗജന്യമായി നല്കും. പ്രാദേശിക സാഹചര്യങ്ങള് കൂടി പരിഗണിച്ച് 1 കിലോ ധാന്യം കൂടി അനുവദിക്കുമെന്നും മന്ത്രി പറഞ്ഞു.
8.69 കോടി കര്ഷകര്ക്ക് അടിയന്തര സാമ്പത്തിക സഹായമായി 2,000 രൂപ വീതം നല്കും. ഏപ്രില് ആദ്യ വാരം തന്നെ ഇതു ലഭ്യമാകും.
തൊഴിലുറപ്പ് കൂലി വര്ധിപ്പിച്ചു. വിധവകള്ക്ക് ആയിരം രൂപ നല്കും.വനിതകള്ക്ക് മൂന്നു്മാസം 500 രൂപ വീതം നല്കും.
പാവപ്പെട്ട 8 കോടി കുടുംബങ്ങള്ക്ക് സൗജന്യ എല്പിജി തുടങ്ങിയവയാണ് പ്രഖ്യാപനങ്ങള്.
മുതിര്ന്ന പൗരന്മാര്, വിധവകള്, ഭിന്നശേഷിക്കാര്, പെന്ഷന്കാര് എന്നിങ്ങനെ മൂന്നുകോടി ആളുകള്ക്ക് 1000 രൂപ വീതം അടുത്ത മൂന്നു മാസവും നല്കും. രണ്ട് തവണകളായിട്ടായിരിക്കും ഈ പണം അക്കൗണ്ടില് നിക്ഷേപിക്കുക.
വനിതാ സ്വാശ്രയ സംഘങ്ങള്ക്ക് നല്കുന്ന ഈടില്ലാത്ത വായ്പ 10 ലക്ഷമായിരുന്നത് 20 ലക്ഷമായി ഉയര്ത്തി.
ഉജ്ജ്വല പദ്ധതിയിലുള്ള പാവപ്പെട്ടവര്ക്ക് മൂന്നു മാസത്തേക്ക് എല്പിജി സിലിണ്ടര് സൗജന്യം. 8.3 കോടി ബിപിഎല് കുടുംബങ്ങള്ക്കാണ് ഇതിന്റെ പ്രയോജനം ലഭിക്കുക
പി.എഫില് നിന്ന് പണം പിന്വലിക്കുന്നതിനുള്ള നിബന്ധനകള് ലഘൂകരിച്ചു
നിര്മ്മാണ ക്ഷേമ ഫണ്ടിലെ 31,000 കോടി രൂപയില് നിന്ന് നിര്മ്മാണ മേഖലയിലെ 3.5 കോടി രജിസ്റ്റര് ചെയ്തിട്ടുള്ള തൊഴിലാളികള്ക്ക് ആശ്വാസ ധനം കൈമാറാന് സംസ്ഥാന സര്ക്കാരുകള്ക്ക് നിര്ദേശം.
