കേന്ദ്ര ഏജന്സികളെ ദുരുപയോഗം ചെയ്ത് എതിരാളികളെ നിശബ്ധരാക്കാനാണ് കേന്ദ്രം ശ്രമിക്കുന്നതെന്ന് ശിവസേന വക്താവ് പ്രിയങ്ക ചതുര്വേദി. മഹാരാഷ്ട്ര നിയമസഭയില് റിപ്പബ്ലിക് ടി.വി മേധാവി അര്ണബ് ഗോസ്വാമിക്കെതിരെ അവകാശ ലംഘന പ്രമേയം അവതരിപ്പിച്ച ശിവസേന എം.എല്.എ പ്രതാപ് സര്നായിക്കിന്റെ ഓഫീസിലും വസതിയിലും എന്ഫോഴ്സ്മെന്റ് ഡയറക്ടറേറ്റ് റെയ്ഡ് നടത്തിയതിന് പിന്നാലെയാണ് പ്രിയങ്ക കേന്ദ്രത്തിനെതിരെ രംഗത്തുവന്നത്.
‘ഇ.ഡി കേന്ദ്ര താല്പര്യങ്ങള് മാത്രം നടപ്പാക്കുന്നതിലേക്ക് ചുരുങ്ങിയിരിക്കുന്നു. ശക്തമായി ഞങ്ങള് അതിനെ പ്രതിരോധിക്കും’ പ്രിയങ്ക ചതുര്വേദി ട്വീറ്റ് ചെയ്തു. സര്നായിക്കിന്റെ മകന് കള്ളപ്പണം വെളുപ്പിച്ചെന്ന ആരോപണത്തെതുടര്ന്നാണ് റെയ്ഡെന്ന് ഇ.ഡി ഉദ്യോഗസ്ഥര് അറിയിച്ചിരുന്നു.
സുരക്ഷാ സേവന കമ്പനിയായ ടോപ്സ് ഗ്രൂപ്പിന്റെ പ്രൊമോട്ടര്മാരുടെ ഉടമസ്ഥതയിലുള്ള പ്രോപ്പര്ട്ടിയില് താനെ, മുംബൈ എന്നിവിടങ്ങളിലെ 10 സ്ഥലങ്ങളിലാണ് തിരച്ചില് നടത്തിയത്. നായിക്കിന്റെ മകനെതിരെ തെളിവ് ശേഖരിക്കലും കേസില് പരിശോധനയും ആണ് ലക്ഷ്യമെന്ന് ഇ.ഡി പറഞ്ഞു. ഇയാളുടെ സ്ഥാപനങ്ങളിലൂടെ കള്ളപ്പണം വെളുപ്പിച്ചുവെന്നാണ് ആരോപണം.
മുഖ്യമന്ത്രി ഉദ്ദവ് താക്കറെ, എന്.സി.പി നേതാവ് ശരദ് പവാര് എന്നിവരെ മോശം ഭാഷ ഉപയോഗിച്ച് റപ്പബ്ലിക് ടി.വി മേധാവി അര്ണബ് ഗോസ്വാമിക്കെതിരെ സെപ്റ്റംബര് 16നാണ് മഹാരാഷ്ട്ര നിയമസഭയില് സര്നായിക് അവകാശ ലംഘന പ്രമേയം അവതരിപ്പിച്ചത്. താനെ ഓവാല-മജിവാഡ നിയമസഭാ മണ്ഡലത്തില്നിന്നുള്ള എം.എല്.എയാണ്.
