പൗരത്വ ഭേദഗതി നിയമത്തിനെതിരെ പരസ്യങ്ങള് നിര്ത്തലാക്കണമെന്ന് കൊല്ക്കത്ത ഹൈക്കോടതി. മമത സര്ക്കാര് പുറത്തിറക്കിയ പരസ്യങ്ങള് പിന്വലിക്കണമെന്നും കോടതി പറഞ്ഞു.
എന്.ആര്.സിക്കും സി.എ.എക്കുമെതിരെ മുഖ്യമന്ത്രി മമതാ ബാനര്ജിയുടെ നേതൃത്വത്തില് വലിയ സമരങ്ങള് നടക്കവെയാണ് സര്ക്കാരിനെതിരെ ഹൈക്കോടതി രംഗത്തെത്തിയത്. ചീഫ് ജസ്റ്റിസ് തോട്ടത്തില് ബി രാധാകൃഷ്ണന് അദ്ധ്യക്ഷനായ ബെഞ്ചിന്റേതാണ് നിര്ദ്ദേശം. ഹര്ജി വിശദമായി ജനുവരി ഒമ്പതിന് പരിഗണിക്കും.
പൗരത്വ ഭേദഗതി നിയമത്തിനെതിരെയും ദേശീയ പൗരത്വ രജിസ്റ്ററിനെതിരെയും പ്രതിഷേധിച്ച് പശ്ചിമ ബംഗാള് മുഖ്യമന്ത്രി മമത ബാനര്ജിയുടെ നേതൃത്വത്തില് മഹാറാലി നടന്നിരുന്നു. എന്.ആര്.സിക്കെതിരെ രണ്ടാം സ്വാതന്ത്ര്യ സമര പോരാട്ടമാണ് വേണ്ടതെന്നും താന് അതിന് നേതൃത്വം നല്കാമെന്നും അവര് പറഞ്ഞിരുന്നു.
