കേരളത്തില് കൊവിഡ് വ്യാപനം രൂക്ഷമായ ഘട്ടത്തില് സംസ്ഥാനത്ത് ഇനി പ്രഖ്യാപിക്കാന് പോകുന്നത് കൂടുതല് ശക്തമായ ലോക്ക്ഡൗണെന്ന് കോവിഡ് നോഡല് ഓഫീസര് ഡോ അമര് ഫെറ്റില്.
കൊവിഡ് വ്യാപനം സംസ്ഥാനത്ത് രൂക്ഷമായി കൊണ്ടിരിക്കുകയാണ്. ഈ ഘട്ടത്തില് കര്ശന നടപടികള് വേണ്ടിവരും. എന്നാല് എത്രദിവസം ഈ ലോക്ഡൗണ് വേണ്ടിവരുമെന്ന കാര്യത്തില് വ്യക്തയില്ലെന്നും അദ്ദേഹം മീഡിയ വണ്ണിനോട് പ്രതികരിച്ചു.
കൊവിഡ് കേസുകള് വര്ധിക്കുന്ന പശ്ചാത്തലത്തില് സമ്പൂര്ണലോക്ഡൗണ് പരിഗണിക്കേണ്ടതായി വരുമെന്ന് മുഖ്യമന്ത്രി പിണറായി വിജയന് ഇന്നലെ വ്യക്തമാക്കിയിരുന്നു. ഇന്നലെ സംസ്ഥാനത്ത് കോവിഡ് രോഗികളുടെ എണ്ണം ആയിരത്തിന് മുകളില് എത്തിയിരുന്നു. ദിനം പ്രതി രോഗികളും സമ്പര്ക്കവും വര്ധിക്കുകയാണ്. അതുകൊണ്ട് ലോക്ഡൗണ് ഉണ്ടായേക്കുമെന്നാണ് സൂചന.
എല്ലാ ഘടകങ്ങളും പരിഗണിച്ച് മാത്രമേ ലേക്ക്ഡൗണ് പ്രഖ്യാപിക്കുകയുള്ളു എന്നാണ് സര്ക്കാര് നിലപാട്. വൈറസ് വ്യാപനം രൂക്ഷമായ പ്രദേശങ്ങള് മാത്രം അടച്ചിടുന്നത് കൊണ്ട് കാര്യമില്ലെന്ന് നിഗമനത്തിലേക്കും സര്ക്കാര് എത്തിയതായാണ് സൂചന. കോവിഡ് പ്രതിരോധ പ്രവര്ത്തനം ചര്ച്ച ചെയ്യാന് നാളെ വിളിച്ച സര്വ കക്ഷി യോഗത്തില് ലോക്ക്ഡൗണ് പ്രഖ്യാപിക്കുന്നത് ചര്ച്ചയാവും. തലസ്ഥാനത്തെ തീരദേശ മേഖലയിലും, കൊല്ലം, പത്തനംതിട്ട, ആലപ്പുഴ, എറണാകുളം, കോട്ടയം, ഇടുക്കി എന്നീ ജില്ലകളിലും സമ്പര്ക്ക വ്യാപനം രൂക്ഷമാണ്.
