ന്യൂഡല്ഹി: ആശമാരുടെ സമരത്തെ വീണ്ടും വിമര്ശിച്ച് സിപിഎം നേതാവ് എ.വിജയരാഘവന്. ആശാ സമരം എല്ലാ ഇടതുപക്ഷ വിരുദ്ധരും മാധ്യമങ്ങളിലെ വലതുപക്ഷവും ചേര്ന്ന് നടത്തുന്നതാണെന്ന് വിജയരാഘവന് പറഞ്ഞു. ജമാഅത്തെ ഇസ്ലാമി, കോണ്ഗ്രസ്, ബിജെപി തുടങ്ങി സിപിഎം വിരുദ്ധര് ചേര്ന്ന് കുറച്ചു പേരെ കൊണ്ടിരുത്തിയാല് സമരമാവില്ല. 90 ശതമാനം ആശമാരും സമരത്തിലില്ലെന്നും വിജയരാഘവന് പറഞ്ഞു. കേന്ദ്രം സ്വീകരിക്കുന്നത് നിഷേധാത്മക സമീപനം.ഇന്സെന്റീവുകള് വര്ധിപ്പിക്കുന്നതില് കൃത്യമായ ഉറപ്പ് നല്കിയിട്ടില്ലെന്നും അദ്ദേഹം പറഞ്ഞു.
അതേസമയം, വിജയരാഘവന് മറുപടിയുമായി ആശാപ്രവര്ത്തകര് രംഗത്തെത്തി.സമരം ചെയ്യുന്നവരുടെ ജാതകം വിജയരാഘവന് നോക്കേണ്ടതില്ലെന്ന് ആശാ സമരസമിതി നേതാവ് എസ്.മിനി പറഞ്ഞു. ‘തൊഴില് എടുക്കുന്നതിന്റെ കൂലിയാണ് ആവശ്യപ്പെടുന്നത്.ഇത് നല്കാന് സര്ക്കാരുകള് തയ്യാറാകണം.കമ്മ്യൂണിസ്റ്റുകാരാണോ അല്ലയോ എന്ന് പരിശോധിക്കേണ്ടതില്ല.കമ്മ്യൂണിസ്റ്റുകാര്ക്ക് മാത്രമാണോ സമരം ചെയ്യാനാകൂ ന്യായമായ ആവശ്യങ്ങള് ഉന്നയിച്ചു നടത്തുന്ന സമരത്തെ അംഗീകരിക്കണം’..മിനി പറഞ്ഞു.
