കോഴിക്കോട്: എരഞ്ഞിപ്പാലത്ത് മകൻ അച്ഛനേയും അമ്മയേയും കുത്തി പരുക്കേൽപ്പിച്ചു. ഗുരുതരമായി പരുക്കേറ്റ ഇരുവരെയും കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. മകൻ മയക്കുമരുന്നിന് അടിമയെന്ന് സൂചന. യുവാവിനെ കസ്റ്റഡിയിലെടുക്കാൻ വന്ന പൊലീസ് ഇയാളെ പിടികൂടാൻ രണ്ടു തവണ ആകാശത്തേക്ക് വെടിവെച്ചു. കോഴിക്കോട് എരഞ്ഞിപ്പാലം സ്വദേശി ഷാജി (50), ബിജി (48) എന്നിവരെയാണ് മകൻ ഷൈൻ കുത്തിപ്പരിക്കേൽപ്പിച്ചത്. പിതാവ് ഷാജിയുടെ പരിക്ക് ഗുരുതരമാണ്. മൽപ്പിടിത്തത്തിനിടെ ഷൈനും പരിക്കേറ്റിരുന്നു. ഇയാളും ചികിത്സയിലാണ്.
ഞായറാഴ്ച രാത്രിയാണ് സംഭവം. മാതാപിതാക്കളെ കുത്തിയ ഷൈൻ മണിക്കൂറുകളോളം ഭീകരാന്തരീക്ഷം സൃഷ്ടിച്ചു. ഇതോടെ ഇയാളെ കീഴടക്കാൻ പൊലീസിന് രണ്ടു തവണ ആകാശത്തേക്ക് വെടിവെക്കേണ്ടി വന്നു. ഒടുവിൽ ഷൈനിനെ പൊലീസ് കസ്റ്റഡിയിലെടുക്കുകയായിരുന്നു.
