കണ്ണൂര്: തെരുവുനായ കുറുകെ ചാടിയതിനെ തുടര്ന്ന് സ്കൂട്ടര് നിയന്ത്രണം വിട്ട് മറിഞ്ഞ് യുവതി മരിച്ചു. കൊട്ടിയൂര് പാലുകാച്ചി സ്വദേശി എ എം രമണിയാണ് മരിച്ചത്. ഹാജിറോഡ്- അയ്യപ്പന്കാവ് റോഡില് ഇറക്കത്തില് ഇന്ന് രാവിലെയാണ് അപകടം നടന്നത്.
കൊട്ടിയൂരിലെ കൊറിയര് സ്ഥാപനത്തിലെ ജീവനക്കാരിയായ രമണി, തന്റെ സ്കൂട്ടര് സര്വീസ് ചെയ്യുന്നതിനാണ് ഇരിട്ടിയിലേക്ക് വന്നത്. തിരക്ക് കുറഞ്ഞ റോഡായതിനാലാണ് മലയോര ഹൈവേ വഴി ഹാജി റോഡിലൂടെ ഇവര് യാത്രക്കായി തിരഞ്ഞെടുത്തത്. എന്നാല് സ്കൂട്ടര് ഇറക്കത്തിലെത്തിയപ്പോഴാണ് നായ കുറുകെ ചാടിയത്.
റോഡിനോട് ചേര്ന്ന് നിര്മ്മിച്ച ഓടയിലേക്ക് സ്കൂട്ടര് നിയന്ത്രണം വിട്ട് മറിഞ്ഞു. രമണി വാഹനത്തില് നിന്ന് തെറിച്ചുപോയി. ഇവരുടെ തല മരത്തിലും സമീപത്തെ ഒരു കല്ലിലും ഇടിച്ചുവെന്നാണ് ദൃക്സാക്ഷികള് പറയുന്നത്. ഇടിയുടെ ആഘാതത്തില് രമണിയുടെ ഹെല്മറ്റ് പൂര്ണമായും തകര്ന്നുപോയി. ആശുപത്രിയിലെത്തിച്ചെങ്കിലും രമണിയുടെ ജീവന് രക്ഷിക്കാനായില്ല.
