കണ്ണൂര് സര്വകലാശാല വൈസ് ചാന്സലര് നിയമനത്തില് ഉന്നത വിദ്യാഭ്യാസ മന്ത്രി ആര്.ബിന്ദുവിനെതിരെ പ്രതിഷേധം കടുപ്പിച്ച് കോണ്ഗ്രസ്.മന്ത്രി രാജിവയ്ക്കണമെന്ന് പ്രതിപക്ഷ നേതാവ് വി ഡി സതീശൻ പറഞ്ഞു മന്ത്രി സ്വജനപക്ഷപാതം കാണിച്ചുവെന്ന് ചൂണ്ടിക്കാട്ടി മുന് പ്രതിപക്ഷ നേതാവ് രമേശ് ചെന്നിത്തല ഇന്ന് ലോകായുക്തയില് പരാതി നല്കും.
കണ്ണൂര് സര്വകലാശാല വൈസ് ചാന്സലറായി ഡോ. ഗോപിനാഥ് രവീന്ദ്രന് പുനര്നിയമനം നല്കണമെന്നാവശ്യപ്പെട്ട് ഉന്നത വിദ്യാഭ്യാസമന്ത്രി ആര്.ബിന്ദു ഗവര്ണര് ആരിഫ് മുഹമ്മദ് ഖാന് അയച്ച കത്ത് കഴിഞ്ഞ ദിവസം പുറത്തുവന്നിരുന്നു. അക്കാദമിക് മികവ് കണക്കിലെടുത്ത് ഗോപിനാഥ് രവീന്ദ്രന് പുനര്നിയമനം നല്കണമെന്നാണ് മന്ത്രി ആവശ്യപ്പെട്ടത്. കാലാവധി അവസാനിക്കുന്നതിന്റെ തൊട്ടുതലേ ദിവസമാണ് മന്ത്രി ഗവര്ണര്ക്ക് കത്ത് നല്കിയത്. ഇതിന് പിന്നാലെയാണ് പ്രതിപക്ഷം പ്രതിഷേധം കടുപ്പിച്ചത്.
കണ്ണൂര് യൂണിവേഴ്സിറ്റി വൈസ് ചാന്സലര് പുനര്നിയമനത്തിന് ശുപാര്ശ ചെയ്തതിലൂടെ മന്ത്രി ആര്.ബിന്ദു സത്യപ്രതിജ്ഞാ ലംഘനം നടത്തിയെന്ന് രമേശ് ചെന്നിത്തല തിങ്കളാഴ്ച രാത്രി പറഞ്ഞിരുന്നു. വി സി നിയമനത്തിൽ മന്ത്രി അനധികൃത ഇടപെടൽ നടത്തിയെന്നതിന് തെളിവാണ് കത്ത്. ഉന്നത വിദ്യാഭ്യാസ മന്ത്രി നടത്തിയത് സത്യപ്രതിജ്ഞാ ലംഘനമാണെന്ന് വി ഡി സതീശൻ പറഞ്ഞു.സി.പി.ഐ.എം നേതാവിന്റെ ബന്ധുക്കള്ക്ക് മാത്രം യൂണിവേഴ്സിറ്റികളില് ജോലി ലഭിക്കുന്നുള്ളുവെന്നും ഈ സാഹചര്യം നിലനില്ക്കുന്നതിനാല് യോഗ്യതയുള്ളവര് ഇത്തരം പോസ്റ്റുകളിലേക്ക് അപേക്ഷിക്കാന് പോലും തയ്യാറാവാറില്ലെന്നും വി.ഡി. സതീശന് കൂട്ടിച്ചേര്ത്തു.
