മലപ്പുറം: കർണാടകത്തിലെ മുന്നേറ്റം കോൺഗ്രസ് ദേശീയതലത്തിൽ ശക്തിപ്രാപിക്കുന്നതിന്റെ സൂചനയാണെന്ന് മുസ്ലീം ലീഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾ. പ്രതിപക്ഷത്തേക്ക് കൂടുതൽ പാർട്ടികളെ കൊണ്ടുവരാൻ കോൺഗ്രസിനു സാധിക്കും. കോൺഗ്രസിന് പരമാവധി വോട്ടുകൾ ലഭിക്കാനായി മുസ്ലീം ലീഗ് സ്ഥാനാർഥികളെ മത്സരിപ്പിച്ചില്ലെന്നും സാദിഖലി തങ്ങൾ മലപ്പുറത്ത് പറഞ്ഞു.
കർണാടകത്തിൽ വ്യക്തമായ കാഴ്ച്ചപ്പാടോടു കൂടിയാണ് ഇന്ത്യൻ യൂണിയൻ മുസ്ലീം ലീഗ് പ്രവർത്തിച്ചതെന്ന് മുസ്ലീം ലീഗ് ദേശീയ ജനറൽ സെക്രട്ടറി പി കെ കുഞ്ഞാലിക്കുട്ടി പറഞ്ഞു. ഒരുതരത്തിലുള്ള ധ്രുവീകരണ ശ്രമവും ഫലിച്ചില്ല. ജനങ്ങളുടെ പ്രശ്നങ്ങളും മതേതരത്വവും ഉയർത്തിപ്പിടിച്ചുള്ള രാഷ്ട്രീയത്തിന് ഇന്ത്യയിൽ ഇപ്പോഴും പ്രസക്തിയുണ്ട്. വർഗീയ കാർഡ് ഇറക്കി എല്ലാം നേടാൻ കഴിയുമെന്ന ബിജെപിയുടെ ആശയത്തിനും തന്ത്രത്തിനും ഏറ്റ വലിയ തിരിച്ചടിയാണ് കർണാടക നിയമസഭാ തെരഞ്ഞെടുപ്പ് എന്നും കുഞ്ഞാലിക്കുട്ടി പറഞ്ഞു.
ദക്ഷിണേന്ത്യയിൽ ബിജെപി ഇല്ലാതായി. കർണാടകത്തിലെ കോൺഗ്രസ് മുന്നേറ്റം ഇന്ത്യൻ രാഷ്ട്രീയത്തിൽ വലിയ പ്രതീക്ഷയാണ് നൽകുന്നത്. കർണാടക തെരഞ്ഞെടുപ്പിന്റെ പ്രതിഫലനം ഇന്ത്യയിലും കേരളത്തിലുമൊക്കെ ഉണ്ടാകും. ബിജെപി വർഗീയ കാർഡ് ഇറക്കിയിട്ടും കർണാടകത്തിൽ വിജയിക്കാനായില്ല. കോൺഗ്രസിന്റെ മുന്നേറ്റമാണ് കാണാൻ കഴിഞ്ഞതെന്നും പി കെ കുഞ്ഞാലിക്കുട്ടി പറഞ്ഞു.
