പാലക്കാട് വീടിനുള്ളില് മരിച്ച നിലയില് കണ്ടെത്തിയ മഹിളാമോര്ച്ച നേതാവ് ശരണ്യയുടെ മരണത്തില് ദുരൂഹത. മഹിളാ മോര്ച്ച പാലക്കാട് മണ്ഡലം ട്രഷറര് ശരണ്യ (27)യെയാണ് ആത്മഹത്യ ചെയ്ത നിലയില് കണ്ടെത്തിയത്. ഇന്നലെ വൈകീട്ട് അഞ്ചോടെയാണ് സംഭവം. വീടിനുള്ളില് തൂങ്ങിയ നിലയില് കണ്ട ശരണ്യയെ ഉടന് തന്നെ വീട്ടുകാര് പാലക്കാട് ജില്ലാ ആശുപത്രിയില് എത്തിച്ചെങ്കിലും രക്ഷിക്കാനായില്ല.
അഞ്ച് പേജുള്ള ആത്മഹത്യാ കുറിപ്പ് പൊലീസ് കണ്ടെടുത്തിട്ടുണ്ട്. പ്രാദേശിക ബിജെപി നേതാവിന്റെ പേര് എഴുതിവെച്ചാണ് ശരണ്യ ആത്മഹത്യ ചെയ്തത്. ബിജെപി ബൂത്ത് പ്രസിഡന്റ് പ്രജീവിന്റെ പേരാണ് ആത്മഹത്യാ കുറിപ്പിലുള്ളത്. പ്രജീവ് ഈ തിരഞ്ഞെടുപ്പില് തന്നെ കൗണ്സിലര് ആക്കാമെന്നും തദ്ദേശതിരഞ്ഞെടുപ്പില് സീറ്റ് നല്കാമെന്ന വാഗ്ദാനങ്ങള് അടക്കം നല്കി വഞ്ചിക്കുകയായിരുന്നുവെന്ന് ആത്മഹത്യാ കുറിപ്പില് പറയുന്നു.
കുഞ്ഞുങ്ങളെ നന്നായി നോക്കണമെന്ന് പറഞ്ഞാണ് ആത്മഹത്യാ കുറിപ്പ് അവസാനിപ്പിക്കുന്നത്. ശരണ്യയുടെ ആത്മഹത്യയ്ക്ക് പിന്നില് ബിജെപി നേതാവ് പ്രജീവാണെന്നാണ് കുടുംബത്തിന്റെയും ആരോപണം. തന്നെ പ്രജീവ് ഉപയോഗപ്പെടുത്തിയെന്ന് ശരണ്യ ആത്മഹത്യ കുറിപ്പില് എഴുതി വെച്ചിട്ടുണ്ടെന്നും ബിജെപി നേതൃത്വത്തിന് ഇക്കാര്യം വ്യക്തമാക്കി പരാതി നല്കിയിട്ടുണ്ടെന്നും ഉചിത നടപടി ഉടന് പ്രതീക്ഷിക്കുന്നതായും ശരണ്യയുടെ കുടുംബം പറഞ്ഞു. സംഭവത്തില് അന്വേഷണത്തിന് ശേഷമാകും കൂടുതല് നടപടിയെന്നാണ് പൊലീസ് അറിയിച്ചു. സിഎന് പുരം നടുവക്കാട്ടുപാളയത്ത് രമേഷാണ് ഭര്ത്താവ്. രാജന്തങ്കം ദമ്പതികളുടെ മകളാണ്. മക്കള്: രാംചരണ്, റിയശ്രീ.
