അര്‍ജന്റൈന്‍ സൂപ്പര്‍ താരം ലയണല്‍ മെസി ( Lionel Messi ) പോര്‍ച്ചുഗീസ് സൂപ്പര്‍ താരം ക്രിസ്റ്റ്യാനോ റൊണാള്‍ഡോ ( Cristiano Ronaldo ) യും തമ്മില്‍ സൗദി അറേബ്യയില്‍ വെച്ച് കൊമ്പു കോര്‍ക്കുമോ … ? ഫുട്‌ബോള്‍ ലോകത്തിന്റെ ഈ ചോദ്യത്തിന് ഏതായാലും ജൂണ്‍ 30 നുള്ളില്‍ ഉത്തരം ലഭിച്ചേക്കും. കാരണം, 2023 ജൂണ്‍ 30 ന് ഫ്രഞ്ച് ക്ലബ്ബായ പി എസ് ജി ( P S G ) യുമായി ഉള്ള ലയണല്‍ മെസിയുടെ കരാര്‍ അവസാനിക്കും.അതോടെ ലയണല്‍ മെസി ഫ്രീ ഏജന്റായി മാറും.
ഇംഗ്ലീഷ് ക്ലബ്ബായ മാഞ്ചസ്റ്റര്‍ യുണൈറ്റഡില്‍ നിന്ന് 1800 കോടി രൂപ പ്രതിഫലത്തില്‍ ആയിരുന്നു ക്രിസ്റ്റിയാനോ റൊണാള്‍ഡോ സൗദി ക്ലബ്ബായ അല്‍ നസറില്‍ എത്തിയത്. അല്‍ നസര്‍ ( Al Nassr ) ക്രിസ്റ്റ്യാനോ റൊണാള്‍ഡോയ്ക്ക് നല്‍കിയതിന്റെ ഇരട്ടി പ്രതിഫലം വാഗ്ദാനം ചെയ്ത് അല്‍ ഹിലാല്‍ ( Al Hilal ) ക്ലബ് ലയണല്‍ മെസിക്കായി രംഗത്ത് എത്തി.
വര്‍ഷം 400 മില്യണ്‍ യൂറോ ( 3600 കോടി രൂപ ) പ്രതിഫലം ആണ് അല്‍ ഹിലാല്‍ ലയണല്‍ മെസിക്ക് മുന്നില്‍ വെച്ചത്. അതേസമയം, ഫ്രഞ്ച് ക്ലബ്ബായ പി എസ് ജി യുമായുള്ള ചര്‍ച്ചകള്‍ ഏകദേശം അവസാനിച്ച മട്ടിലാണ്. ലയണല്‍ മെസി ഫ്രഞ്ച് ക്ലബ്ബില്‍ തുടരാന്‍ താത്പര്യം അറിയിച്ചെങ്കിലും അദ്ദേഹത്തിന്റെ ഡിമാന്‍ഡ് അംഗീകരിക്കാന്‍ പി എസ് ജി തയാറായിട്ടില്ല എന്നാണ് അറിയുന്നത്.
ക്ലബ്ബില്‍ അധികാരം വേണം എന്ന ലയണല്‍ മെസിയുടെ ആവശ്യമാണ് പി എസ് ജിക്കു മുന്നില്‍ നിലവില്‍ കീറാമുട്ടി ആയി തുടരുന്നത്. ഇതിനിടെ ഇംഗ്ലീഷ് ക്ലബ്ബായ മാഞ്ചസ്റ്റര്‍ യുണൈറ്റഡ് എഫ് സി മാര്‍ക്കസ് റാഷ്‌ഫോഡിനെ നല്‍കി സ്വാപ് ഡീലിനായി രംഗത്ത് എത്തി എന്നും സ്ഥിരീകരിക്കാത്ത റിപ്പോര്‍ട്ട് ഉണ്ട്.
സൗദി അറേബ്യയില്‍ നിന്നുള്ള ഓഫര്‍ ലയണല്‍ മെസി തള്ളി കളയും എന്നാണ് അദ്ദേഹത്തോട് അടുത്തുള്ള വൃത്തങ്ങള്‍ സൂചിപ്പിക്കുന്നത്. യൂറോപ്പ് വിട്ട് പുറത്തേക്ക് ക്ലബ് ഫുട്‌ബോള്‍ കളിക്കാന്‍ ലയണല്‍ മെസി താത്പര്യപ്പെടുന്നില്ല എന്നതാണ് ഇതിന്റെ കാരണം. ലയണല്‍ മെസിയുടെ പഴയ ക്ലബ്ബായ സ്പാനിഷ് സംഘം എഫ് സി ബാഴ്‌സലോണ ( F C Barcelona ) യും താരത്തെ തിരികെ എത്തിക്കാന്‍ ശ്രമിക്കുന്നുണ്ട്. എന്നാല്‍, സാമ്പത്തിക പ്രതിസന്ധിയും ട്രാന്‍സ്ഫര്‍ പ്രതിസന്ധിയും തരണം ചെയ്ത് എഫ് സി ബാഴ്‌സലോണ ലയണല്‍ മെസിയെ സ്വന്തമാക്കാന്‍ സാധ്യത കുറവാണ്.
