കോഴിക്കോട്: കോഴിക്കോട് മെഡിക്കല് കോളേജിലെ അത്യാഹിത വിഭാഗത്തിലെ യു.പി.എസ് റൂമില് നിന്നുണ്ടായ തീപിടിത്തത്തിനു കാരണം ഷോര്ട്ട് സര്ക്യൂട്ടാണെന്ന് ആരോഗ്യ മന്ത്രി വീണ ജോര്ജ്. പ്രാഥമിക അന്വേഷണത്തില് മനസ്സിലാകുന്നത് ഷോര്ട്ട് സര്ക്യൂട്ടാണെന്നാണ്.
സംഭവിച്ചത് അസാധാരണമായ സംഭവമാണെന്നും അവര് പറഞ്ഞു. വിദഗ്ദ്ധ പരിശോധനകള് ഉണ്ടാകും. അടിയന്തര ഉന്നതതല യോഗം ചേര്ന്നതിന് ശേഷം ബാക്കി കാര്യങ്ങള് തീരുമാനിക്കുമെന്നും മാധ്യമപ്രവര്ത്തകരോട് സംസാരിക്കവേ അവര് അറിയിച്ചു. സാങ്കേതിക പരിശോധനകള് ഇതിന്റെ ഭാഗമായി ഉണ്ടാകും.
വിശദമായ അന്വേഷണമാണ് നടക്കുക. ജില്ലാ മെഡിക്കല് ഓഫിസറോട് റിപ്പോര്ട്ട് തേടിയിട്ടുണ്ട്. രോഗികളെയെല്ലാം സ്ഥലത്ത് നിന്ന് മാറ്റാന് സാധിച്ചിട്ടുണ്ട്. രോഗികളുടെ ചികിത്സാ ചിലവ് വഹിക്കുന്ന കാര്യത്തില് യോഗം ചേര്ന്നതിന് ശേഷം മാത്രം തീരുമാനം പറയാന് സാധിക്കൂവെന്നും മന്ത്രി കൂട്ടിച്ചേര്ത്തു. വെള്ളിയാഴ്ച രാത്രി ഏഴരയോടെയാണ് മെഡിക്കല് കോളേജ് അത്യാഹിത വിഭാഗത്തില് നിന്ന് പുക ഉയര്ന്നത്. ഉടന് തന്നെ ഫയര്ഫോഴ്സ് സ്ഥലത്തെത്തി രോഗികളെ ഒഴിപ്പിച്ചു. സംഭവത്തില് ആരോഗ്യ മന്ത്രി വീണാ ജോര്ജ് മെഡിക്കല് വിദ്യാഭ്യാസ വകുപ്പ് ഡയറക്ടര്ക്ക് അന്വേഷണത്തിന് നിര്ദേശം നല്കിയിട്ടുണ്ട്.
