സോളാര് പീഡനക്കേസിൽ മുന്മുഖ്യമന്ത്രി ഉമ്മന് ചാണ്ടിക്കെതിരായ പരാതിയില് അന്വേഷണത്തിന്റെ ഭാഗമായി സിബിഐ ക്ലിഫ് ഹൗസില്. തെളിവെടുപ്പുകളുടെ ഭാഗമായാണ് സിബിഐ സംഘം പരാതിക്കാരിയുമായി നേരിട്ടെത്തി മുഖ്യമന്ത്രിയുടെ ഔദ്യോഗിക വസതിയില് തെളിവെടുപ്പിനെത്തിയത് ആറ് എഫ്ഐആറുകളാണ് സോളാര് പീഡനക്കേസുമായി രജിസ്റ്റര് ചെയ്തിട്ടുള്ളത്.ഓരോ പരാതികളും ഓരോ സംഘമാണ് പരിശോധിക്കുന്നത്.ഇപ്പോള് ഉമ്മന്ചാണ്ടിക്കെതിരേയുള്ള പരാതിയുടെ തെളിവെടുപ്പിനായാണ് സിബിഐ സംഘം ക്ലിഫ് ഹൗസില് എത്തിയിരിക്കുന്നത്. പ്രത്യേക അനുമതി വാങ്ങിയതിന് ശേഷമാണ് മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസില് തെളിവെടുപ്പ് നടക്കുന്നത്.
2012 ആഗസ്റ്റ് 19ന് ക്ലിഫ് ഹൗസില് വച്ച് ഉമ്മന്ചാണ്ടി ലൈംഗികമായി പീഡിപ്പിച്ചുവെന്നാണ് പരാതിക്കാരിയുടെ ആരോപണം. ആദ്യഘട്ടത്തില് കേരള പൊലീസ് അന്വേഷിച്ച കേസില് ഉമ്മന് ചാണ്ടിയ്ക്കെതിരെ തെളിവില്ലെന്ന് റിപ്പോര്ട്ട് സമര്പ്പിച്ചിരുന്നു. ഇതിന് പിന്നാലെ പരാതിക്കാരി കേസ് സിബിഐയ്ക്ക് വിടണമെന്ന് സംസ്ഥാന സര്ക്കാരിനോടു ആവശ്യപ്പെടുകയായിരുന്നു. ഇതോടെ കഴിഞ്ഞ നിയമസഭാ തെരഞ്ഞെടുപ്പിന് തൊട്ടുമുമ്പായിരുന്നു കേസ് സംസ്ഥാന സര്ക്കാര് സിബിഐക്ക് വിട്ടത്.
ഉമ്മന്ചാണ്ടിക്കെതിരായ പീഡന പരാതി;പരാതിക്കാരിക്കൊപ്പം തെളിവെടുപ്പ്; സിബിഐ സംഘം ക്ലിഫ് ഹൗസില്
