കേരള യൂണിവേഴ്സിറ്റി വൈസ് ചാൻസിലർ നിയമനത്തിൽ ഹൈക്കോടതിയിൽ വീണ്ടും ഹർജി. സെനറ്റംഗം എസ്.ജയറാമാണ് ഹർജി നൽകിയത്. വി.സി നിയമനത്തിനുള്ള സെർച്ച് കമ്മിറ്റിയിലേക്ക് പ്രതിനിധിയെ നാമനിർദേശം ചെയ്യാൻ സെനറ്റിനോട് നിർദേശിക്കണമെന്ന് ഹർജിയിൽ ആവശ്യപ്പെട്ടു. സെനറ്റ് പ്രതിനിധിയെ നാമനിർദേശം ചെയ്യാത്തത് മനഃപൂർവമെന്ന് ഹർജിയിൽ പറയുന്നു.
സെനറ്റിലെ നല്ലൊരു ശതമാനവും പ്രതിനിധിയെ നിർദേശിക്കണമെന്ന നിലപാടുകാരാണ്. ചാൻസിലർ തങ്ങൾക്ക് കീഴടങ്ങണമെന്ന സെനറ്റിന്റെ ആവശ്യം ഭീകരപ്രവർത്തനത്തിന് സമാനമെന്ന് ഹർജിക്കാരൻ പറയുന്നു. രാഷ്ട്രീയപ്രേരിതമായാണ് സെനറ്റംഗങ്ങളുടെ പ്രവർത്തനം. നവംബർ നാലിന് നടന്ന സെനറ്റ് യോഗത്തിൽ പങ്കെടുക്കാൻ പ്രതിനിധികളെത്തിയത് എകെജി സെന്ററിൽ നിന്നുമാണ്. സെർച്ച് കമ്മിറ്റി അംഗത്തെ സെനറ്റ് നാമനിർദേശം ചെയ്യാത്ത പക്ഷം വേണ്ട നടപടി കൈക്കൊള്ളാൻ ചാൻസലറോട് നിർദേശിക്കണമെന്നും ഹർജിക്കാരൻ പറഞ്ഞു.
