കോടഞ്ചേരിയിലെ ഡി.വൈ.എഫ്.ഐ ബ്ലോക്ക് കമ്മിറ്റി മെമ്പര് ഷെജിനും ജോയ്സനയും തമ്മിലുള്ള വിവാഹം ലൗ ജിഹാദാണെന്ന രീതിയിലുള്ള തന്റെ പ്രസ്താവന നാക്കുപിഴയാണന്ന് മുന് എം.എല്.എ ജോര്ജ് എം.തോമസ്.കേരളത്തിൽ ലൗ ജിഹാദ് ഇല്ല എന്നതാണ് വാസ്തവമെന്ന് ജോർജ് എം തോമസ് തിരുത്തി. ലൗ ജിഹാദ് ഉണ്ടെന്ന് താൻ പറഞ്ഞിട്ടില്ല. തെറ്റിദ്ധരിക്കാവുന്ന വിധത്തിൽ പ്രതികരിച്ചത് ഒഴിവാക്കാമായിരുന്നു. നിരവധി പേർ വിദേശത്തുനിന്നടക്കം വിളിച്ചു വിമർശനം അറിയിച്ചുവെന്നും ജോർജ് എം തോമസ് പറഞ്ഞു. മിശ്ര വിവാഹത്തെയൊക്കെ പാര്ട്ടി എപ്പോഴും അംഗീകരിക്കുന്നതാണ്. അതിലൊന്നുമല്ല പ്രശ്നം. വിവാഹം കഴിക്കാന് തീരുമാനിച്ച കാര്യം ആദ്യം അവര് പാര്ട്ടിയെ അറിയിക്കണമായിരുന്നു. അങ്ങനെയെങ്കില് പാര്ട്ടി ഇടപെട്ട് കാര്യങ്ങള് ചെയ്യുമായിരുന്നു. ലൗജിഹാദ് വിഷയത്തില് പാര്ട്ടി സെക്രട്ടറി പറഞ്ഞതാണ് നയമെന്നും ജോര്ജ് എം തോമസ് പ്രതികരിച്ചു.
ഇന്നലെ ഒരു ചാനലില് ഞാന് അങ്ങനെ പറഞ്ഞതായിട്ടാണ് വാര്ത്ത പ്രസിദ്ധീകരിക്കപ്പെട്ടത്. എന്നാല് ലൗ ജിഹാദ് എന്ന് പറയുന്ന പദം ഞങ്ങളുടെതല്ല, ആര്.എസ്.എസ് ഉണ്ടാക്കിയിട്ടുള്ള വിഷയമാണ്. കേരളത്തില് അങ്ങനെ പ്രതിഭാസം നിലനില്ക്കുന്നില്ല എന്ന് സര്ക്കാരും മുഖ്യമന്ത്രി പിണറായി വിജയനും എന്.ഐ.എ അന്വേഷണ ഏജന്സിയുമെല്ലാം വ്യക്തമാക്കിയതാണ്. അതിനപ്പുറം ഞാന് എന്ത് പറയാനാണ്. എന്നാല് അങ്ങനെ തെറ്റിദ്ധരിക്കാവുന്ന വിധത്തിലാണ് സംഭാഷണം പുറത്ത് വന്നത്.
പറഞ്ഞത് തെറ്റായി വ്യാഖ്യാനിക്കപ്പെട്ടു,അറിയിക്കാതെ ചെയ്തത് തെറ്റ്,ലൗജിഹാദ് എന്നൊന്നില്ല-ജോര്ജ് എം തോമസ്
