പടനിലം ജംഗ്ഷന് നവീകരണത്തിന് 1 കോടി രൂപയുടെ ഭരണാനുമതി ലഭ്യമാക്കിയതായി പി.ടി.എ റഹീം എം.എല്.എ അറിയിച്ചു. 2021-22 ബഡ്ജറ്റില് ഈ പ്രവൃത്തിക്ക് തുക വകയിരുത്തിക്കൊണ്ടുള്ള പ്രഖ്യാപനം ഉൾപ്പെത്തിയിരുന്നു.
നാഷണല് ഹൈവേ 766 ലെ പ്രധാനപ്പെട്ട ജംഗ്ഷനുകളിലൊന്നാണ് പടനിലം. മലബാറിലെ തിരക്കേറിയ തീര്ത്ഥാടന കേന്ദ്രങ്ങളിലൊന്നായ സി.എം മഖാം ഉള്പ്പെടെ സ്ഥിതി ചെയ്യുന്ന നരിക്കുനി റോഡ് ഈ ജംഗ്ഷനിലാണ് സന്ധിക്കുന്നത്.
5.5 കോടി രൂപയുടെ ഭരണാനുമതി ലഭ്യമാക്കിയ പടനിലം പാലത്തിലേക്കുള്ള അപ്രോച്ച് റോഡ് ആരംഭിക്കുന്ന ഈ ജംഗ്ഷന് വീതികൂട്ടി നവീകരിക്കണമെന്ന ദീര്ഘകാലമായുള്ള ആവശ്യം പരിഹരിക്കുന്നതിന് ഈ പ്രവൃത്തി പൂര്ത്തീകരിക്കുന്നതോടെ സാധ്യമാവും.
ജംഗ്ഷന്റെ ഇരുവശങ്ങളിലും സ്ഥലമേറ്റെടുക്കുന്നതിന് ഡിസൈന് തയ്യാറാക്കുകയും നടപടികള് ആരംഭിക്കുകയും ചെയ്തിട്ടുണ്ട്. ആയത് പൂര്ത്തിയാവുന്ന മുറക്ക് നവീകരണ പ്രവൃത്തി ആരംഭിക്കുന്നതിനാണ് പദ്ധതി തയ്യാറാക്കിയിട്ടുള്ളതെന്നും എം.എല്.എ പറഞ്ഞു.