കൊറോണ വൈറസിനെതിരെയുള്ള പോരാട്ടത്തില് രണ്ട് മെയ്ഡ് ഇന് ഇന്ത്യ വാക്സിനുകള് ഉപയോഗിച്ച് ‘മനുഷ്യരാശിയെ രക്ഷിക്കാന്’ ഇന്ത്യ തയ്യാറാണെന്ന് പ്രധാനമന്ത്രി നരേന്ദ്ര മോദി. ലോകത്തിലെ ഏറ്റവും കുറഞ്ഞ കോവിഡ് മരണനിരക്കും ഉയര്ന്ന രോഗമുക്തി നിരക്കും കൂടുതലുള്ള രാജ്യങ്ങളിലൊന്നാണ് ഇന്ത്യയെന്നും 16-ാമത് പ്രവാസി ഭാരതീയ ദിവസ് കണ്വെന്ഷന് ഉദ്ഘാടനം ചെയ്തു കൊണ്ട് മോദി പറഞ്ഞു.
ലോകമെമ്പാടുമുള്ള ഇന്ത്യക്കാരുടെ മനസ്സ് ‘മാ ഭാരതി’ കാരണം ബന്ധപ്പെട്ട് കിടക്കുന്നു. വെല്ലുവിളികളുടെ വര്ഷമാണ് കഴിഞ്ഞതെന്നും പി എം കെയേഴ്സ് ഫണ്ടിലേക്കുള്ള പ്രവാസികളുടെ സംഭാവന പ്രശംസനീയമാണെന്നും നരേന്ദ്ര മോദി പറഞ്ഞു. വിദേശത്ത് ഇന്ത്യന് വംശജര് വെല്ലുവിളികളെ നേരിടാനുള്ള ശ്രമങ്ങള് നടത്തിയതിനെയും പ്രധാനമന്ത്രി പ്രശംസിച്ചു.
പി.പി.ഇ കിറ്റ്, മാസ്ക്, വെന്റിലേറ്റര് മുതലായ ഉപകരണങ്ങള് നേരത്തെ രാജ്യത്തിന് പുറത്ത് നിന്നാണ് വന്നിരുന്നത്. എന്നാല് ഇന്ന് നമ്മുടെ രാജ്യം സ്വാശ്രയമാണ്. അഴിമതി തടയുന്നതിന് ഇന്ത്യ ഇന്ന് ടെക്നോളജി ഉപയോഗിക്കുന്നു. ലക്ഷങ്ങളും കോടികളും വിലമതിക്കുന്ന പണം നേരിട്ട് ഗുണഭോക്താവിന്റെ ബാങ്ക് അക്കൗണ്ടിലേക്കെത്തുന്നുവെന്നും അദ്ദേഹം പറഞ്ഞു. ‘ഇന്ത്യ തകരുമെന്നും ജനാധിപത്യം രാജ്യത്ത് അസാധ്യമാകുമെന്നും ചില ആളുകള് പറഞ്ഞു. എന്നാല് യാഥാര്ഥ്യം, ഇന്ത്യ ഇന്ന് ശക്തവും ഊര്ജ്ജസ്വലവുമായ ജനാധിപത്യരാജ്യമായി ഒന്നിച്ചുനില്ക്കുന്നു’ മോദി കൂട്ടിച്ചേര്ത്തു. രാജ്യത്തെ ദരിദ്രരെ ശാക്തീകരിക്കുന്നതിനായി ഇന്ത്യയില് നടന്നുകൊണ്ടിരിക്കുന്ന പ്രചാരണം ലോകമെമ്പാടും ചര്ച്ചചെയ്യപ്പെടുകയാണ്. പുനരുപയോഗ ഊര്ജ്ജമേഖലയില് വികസ്വര രാജ്യത്തിനും നേതൃത്വം നല്കാമെന്ന് തങ്ങള് തെളിയിച്ചെന്നും പ്രധാനമന്ത്രി പറഞ്ഞു.
