സുൽത്താൻബത്തേരി: വയനാട് മുത്തങ്ങയിൽ വീണ്ടും വൻ മയക്കുമരുന്ന് വേട്ട. കെഎസ്ആർടിസി ബസിൽ കടത്തിക്കൊണ്ടുവരികയായിരുന്ന 49.54 ഗ്രാം അതിമാരക മയക്കുമരുന്നായ എംഡിഎംഎയുമായി യുവാവ് പിടിയിലായി. മുത്തങ്ങ പോലീസ് എയ്ഡ് പോസ്റ്റിനു സമീപത്ത് നടത്തിയ പരിശോധനയിലാണ് മുട്ടിൽ സ്വദേശിയായ അഭയം വീട്ടിൽ മിൻഹാജ് ബാസിം (24) നെ ബത്തേരി പോലീസ് പിടികൂടിയത്.
മയക്കുമരുന്നിൻ്റെ ഉറവിടത്തേക്കുറിച്ചും പോലീസ് അന്വേഷിച്ചു വരികയാണ്. ഇയാൾക്കെതിരെ എൻഡിപിഎസ് നിയമപ്രകാരം കേസ് രജിസ്റ്റർ ചെയ്ത് തുടർനടപടികൾ സ്വീകരിച്ചു വരികയാണ്. കഴിഞ്ഞ തിങ്കളാഴ്ച മുത്തങ്ങ ചെക്പോസ്റ്റിൽ നടത്തിയ പരിശോധനയിൽ 45.79 ഗ്രാം എംഡിഎംഎയുമായി യുവാവ് അറസ്റ്റിലായിരുന്നു. മലപ്പുറം പള്ളിപ്പുറം സ്വദേശിയായ തറവാട്ടിൽ വീട്ടിൽ മുഹമ്മദ് ബാസിത്(27)നെയായിരുന്നു ബത്തേരി പോലീസ് അറസ്റ്റ് ചെയ്തത്.
അതിർത്തികളിലൂടെ കേരളത്തിലേക്ക് എംഡിഎംഎ പോലുള്ള മാരക മയക്കുമരുന്നുകളുടെ കടത്തൽ വ്യാപകമായതിനെ തുടർന്ന് പൊതുജനങ്ങൾ ജാഗ്രത പുലർത്തണമെന്നും ലഹരിക്കടത്തോ ഉപയോഗമോ ശ്രദ്ധയിൽപ്പെട്ടാൽ ആ വിവരങ്ങൾ ഉടൻ പോലീസിലോ മറ്റു ബന്ധപ്പെട്ട ഉദ്യോഗസ്ഥരോടോ അറിയിക്കണമെന്നും പോലീസ് കൂടുതൽ പരിശോധനകളും കർശന നടപടികളും സ്വീകരിക്കുമെന്നും ജില്ലാ പോലീസ് മേധാവി അറിയിച്ചു.
